Хайрулла Ҳамидов Ўзбекистон ОТЖнинг кечаги мағлубияти борасида нималар деди?

Хабарингиз бор, кеча Таиланд пойтахти Бангкок шаҳрида Ўзбекистон олимпия терма жамоаси гуруҳ босқичининг охирги турида Жанубий Корея билан куч синашди. Асосан рақибнинг устунлигида ўтган беллашувда кореяликлар 2:1 ҳисобида зафар қучишди.

Ўйиндан сўнг таниқли шарҳловчи Хайрулла Ҳамидов телеграмдаги ўзининг саҳифасида учрашувга оид ўзининг фикрларини ёзиб қолдирди.

- Ҳаммаси сценарий остида кетяпти: Фурор кўтариб чиқиш яхшимасди плей-оффга, устида ишламай қўярди олимпия жамоамиз. Энди жимгина, ҳеч қандай пафоссиз тараддуд кўради Друлович.

Мана шунақа танқидий руҳга сабаб ўйин гуруҳнинг охирги ўйини бўлгани янада яхши. Плей-оффда ёмон ўйнагандан кўра.

Кейин эътибор беряпсизми, Эрон билан яхши чиқмаган ўйинимиз йигитларга масъулият юклаганди - Хитойни эзиб ташлашди. Яхши ўйиндан сўнг бирдан "эркаланиш" бошланди. Яна ўша Эрондан кейинги ўйин сингари хулоса чиқаришади, деб умид қиламиз.

Фақат, йигитлар, плей-оффдаги ҳамма ўйинда яхши ўйнаш керак. У ерда биринчи ва учинчи ўйинимиз йўқ. Барчаси финал мақомида. Омад!!! - деди Хайрулла Ҳамидов.