Холанд "Реал" ва "Барса" ўртасида танлов қилди

Эрлинг Холанд келаси ёздаги трансфер ойнасида дунё футболида энг кўп муҳокама қилинадиган фигуралардан бирига айланиши мумкин. Испанияда чоп этиладиган El Nacional нашри норвегиялик юлдуз ҳужумчи келажагига бағишланган навбатдаги мақоласини эълон қилди.

Нашр маълумотларига кўра, Холанд ўз қарорини аллақачон қабул қилган: 2026/2027 йилги мавсум «Манчестер Сити» таркибидаги сўнгги мавсуми бўлади. Клуб атрофидаги молиявий қоидалар бузилишига оид можаролар эса Эрлингнинг жамоани тарк этиш истагини янада кучайтиргани айтилмоқда.

El Nacional манбаси ёзишича, норвегиялик ҳужумчи кейинги манзили сифатида Испания чемпионатини кўзламоқда. Манбанинг таъкидлашича, Холанд «Реал» эмас, айнан «Барселона» сафига ўтишни маъқул кўрмоқда.

- Ҳозирги пайтда Флик бошқараётган лойиҳа Холандни Моуриньо жамоасига нисбатан анча кўпроқ ўзига жалб қилмоқда. «Реал» таркибида эса Мбаппе ва Винисиус борлиги туфайли Эрлинг учун асосий таркибда доимий ўрин топиш қийин бўларди. У Рафинья ва Ямал билан бирга майдонга тушиб, кучли ҳужум учлиги шакллантириш ғоясига анча қизиқмоқда», — дея ёзади El Nacional.

26 ёшли Эрлинг Холандни Transfermarkt портали мутахассислари 220 миллион евро атрофида баҳоламоқда.