Холанднинг энг “нозик” нуқтаси яна панд берди

Англия кубоги финалида “Манчестер Сити” футболчилари “Кристал Пэлас”га 0:1 ҳисобида имкониятни бой бериб, мавсумни соврин билан якунлаш имкониятидан мосуво бўлди.

Ўз навбатида, “Кристал Пэлас” ўз тарихида илк бор нуфузли совринга эга чиқди ва тарихий ғалабани кенг нишонламоқда.

Статистика экспертлари “Манчестер Сити” тўпурари Эрлинг Холанднинг “қора анъанаси”га эътибор қаратди. Норвегиялик ҳужумчи финалда тўлиқ ўйнаган бўлса-да, бирорта самарали ҳаракатни амалга оширгани йўқ.

Маълум бўлишича, 24 ёшли тўпурар “Манчестер Сити”га келганидан буён жами турли турнирларда саккиз марта финалларда ўйнаган ва уларнинг бирортасида гол ёки ассист қайд этгани йўқ.

“Кристал Пэлас”га қарши баҳсда Холанд финаллардаги қуруқ сериясига барҳам бериши мумкин эди. Бироқ норвегиялик футболчи рақиб дарвозасига белгиланган пенальтини тепмади ва бу ҳуқуқни Умар Мармушга топширди. Мисрлик футболчи эса, ҳисобни тенглаштира олмади. Унинг зарбасини рақиб посбони Дин Хендерсон қайтарди.

Умуман олганда эса, Эрлинг Холанд жорий мавсумда жами 41 та учрашувда майдонга тушиб, ўз ҳисобига 30 та гол ва тўртта ассист расмийлаштирган.