Хориждаги легионеримиз: "Фаолиятимда ортга ташланган қадам эканини биламан, аммо бу ерда четдан келганларга 20 минг долларгача маош берилади"

Бир неча мавсум “Сурхон” шарафини жамоа сардори сифатида ҳимоя қилган Асрор Ғофуров ўтган йил охирларида Бангладеш чемпионатига кетишга қарор қилганди.

Хабарингиз бўлса, бу ҳолатга “Сурхон” клубида юз берган воқеа сабаб бўлган. Яъни, Асрор Ғофуров ҳам ўзаро футболчилар билан боғлиқ можароли вазиятга аралашиб қолгани туфайли ЎФА томонидан маълум муддатга футболдан четлатилганди. Кейин эса у оқланди.

Аммо ўша пайтда футболсиз қолиб кетишни хоҳламагани учун савияси пастроқ бўлса ҳам Бангладеш чемпионатига легиоер сифатида кетишга мажбур бўлди. Ғофуров Sports.uz сайтига ҳозирги ҳолати ҳақида гапирди.

“Ўзимизни Суперлигага қиёслаб бўлмайди”

- Келганимга уч ой бўлди. Шу пайт давомида Бангладеш муҳитига анча мослашиб олдим. Оила-аъзоларим ҳам яқинда келишди. Бу ерда чемпионат бошланганига ҳали кўп бўлмади. 15 кунча илгари старт олди. “Саиф Спортинг” клуби сафида ҳозирча учта ўйинда қатнашдик. Шуларнинг иккитасида ютдик ва биттасида мағлубиятга учрадик. Турнир жадвалида 3-ўринда кетяпмиз. Биз чемпионлик учун курашяпмиз. Умуман олганда, бу ернинг савияси анча паст. Лекин яхши легионерлар ҳисобига Бангладеш чемпионатини кучайтиришга ҳаракат қилишяпти. Ўз сафида савияли легионерларига эга бўлган клублар ҳам бор. 4-5 та чемпионлик учун кураша оладиган жамоалар бор экан. Лекин Бангладеш чемпионатининг мавқеини жуда ҳам паст, дея олмайман. Ўзбекистонда ўйлашганидек, бу ердаги миллий биринчилик даражаси ўта салбий эмас. Бангладеш футболида катта ўзгаришлар бўляпти. Табиийки, ўзимизни Суперлигага қиёслаб бўлмайди.

“Шартномам август ойигача”

- Ҳа, Бангладешга келишим бирданига юз берди. Ўтган йилги воқеалардан кейин ЎФА менга таъқиқ қўйганди. Мени эса бундай ҳолатда фақат кетишимга тўғри келарди. Янги мавсум бошланиши учун орада кўп вақт бор эди. Аммо яна Ўзбекистон чемпионатига қайтиш ниятим бор. Ҳозирча Бангладешдаман. Клубим билан шартномам август ойининг охиригача тузилган. Қолганини вақт кўрсатади. Вазиятга қараб иш тутаман. Ҳозирча бу ердаги ишларим ёмон эмас. Агар бу йил чемпион бўлсак, яна яхши вариантлар бўлади, деб ўйлайман.

“ЎФА мени 1-2 йилга четлатади, деб ўйлагандим”

- Ўтган йилги воқеалардан кейин ЎФА мени камида бир-икки йилга четлатади, деб ўйлагандим. Худога шукр, вақт ўтиб, оқландим. Ўша пайтда менга Индонезия, Бангладеш ва Таиланд жамоаларидан таклифлар бор эди. Индонезия билан Таиланд чемпионатини кейинроқ бошланишини билганимдан кейин менга тезроқ старт оладиган чемпионат кераклиги боис Бангладеш вариантини танладим. Бу ернинг 2-3 та клублари менга қаттиқ қизиқди. ЎФА томонидан таъқиқ қўйилиши биланоқ агентимга тезроқ вариант топгин, мени ҳеч бўлмаганда бир йилга футболдан четлатишлари мумкин, ҳаммаси ҳал бўлгунча бошқа жойда ўйнаб туришим керак, спорт формамни йўқотиб қўймаслигим лозим, деб айтганман. Бангладешга келганимдан кейин орадан кўп ўтмасдан Кубок баҳслари бошланиб кетди.

“Сурхон”даги маълумотларни Sports.uz орқали билиб боряпман”

- “Сурхон”даги ҳозирги ҳолат билан яқиндан таниш эмасман. Клуб тўғрисидаги маълумотларни Sports.uz сайти орқали билиб боряпман. Клубга янги мутахассислар келганди ва ўрнига яна бошқалари келишибди. Янги ҳомийлар катта мақсадларни қўйган. “Сурхон”га омад тилайман. Сурхондарёда жаҳон стандартларига жавоб берадиган стадион, академиялар бўлишини хоҳлайман. “Сурхон”нинг янги эгалари катта мақсадлар билан келишаётган экан. Бу клубда уч йил тўп сурдим, мени қўллаб-қувватлаган барча мухлисларга раҳмат айтаман.

“Бангладеш клублари маошларни вақтида тўлаш бўйича профессионал”

- Бангладешда маош томонлама ҳеч қанақа муаммо йўқ. Ҳаммаси ўз вақтида тўланади, кечикиш бўлмайди. Бу ернинг савияси паст, аммо бошқа жойлардан легионерлар нима учун келишади? Боя айтганимдек, бир қатор клублари чемпионлик учун курашишади. Улар эса хорижлик футболчиларга анча яхши ҳақ тўлайди. Яширмайман, 5 минг доллардан 15-20 минг долларгача маош берилади. Легионерлар учун энг кам ойлик маош айнан 5 минг доллардан бошланади. Мен бу гапим билан фақат яхши жамоаларни назарда тутяпман, қуйироқдаги клублар ҳақида гапирмаяпман. Ўзбекистонлик футболчиларни четга кетишига биринчи сабаб молиявий ҳолат билан боғлиқ, деб ўйлайман. Ўзингизга маълум, чемпионатимизда кўп ўйинчилар маошларини ололмай юрадилар. Бангладеш чемпионати савияси паст бўлса ҳам моддий томондан, ойлик маошларини вақтида тўлаш бўйича клублари анча профессионал.

“Ҳаммаси инсонни ўзига боғлиқ”

- Бангладеш чемпионатида тўп суриш мен учун фаолиятимда орқага ташланган қадам эканини ўзим ҳам билиб турибман. Лекин биринчи навбатда, барча нарса инсонни ўзига боғлиқ. Яхши футболчи ҳеч қачон ҳаракатдан тўхтамаса ва ўз устида ишлайверса, ҳамма нарса бўлиши мумкин. Футболда сюрпризлар бўлиб туради. Бугун Бангладешда бўлсам, эртага кучлироқ чемпионатда ўйнашим мумкин. Менда шундайки, қаерда ўйнаётган бўлсам, қаерда нон топаётган бўлсам, ўша ерда 100 фоиз кучимни бериб, ёрдамлашишга ҳаракат қиламан. Савия жиҳатидан ортга чекиниш бўлгандир, лекин боя айтганимдек, ҳаммаси ўзимга боғлиқ. Футболда бир мавсум яхши ўйнасангиз, кимгадир керак бўласиз, агар яхши ўйнамасангиз кўздан йўқолиб қоласиз.