Ямал Беллингемга унинг гаплари билан жавоб қайтарди

Ламин Ямал ўтган куздаги "Эл-класико" олдидан бир нечта шов-шувли баёнотлар билан чиққанди.

Ўша баҳсда "Реал Мадрид" "Барселона"ни 2:1 ҳисобида мағлуб этган, Ямал эса омадсиз ўйин ўтказганди.

Учрашувдан кейин Жуд Беллингем ижтимоий тармоқда: "Сўзлар ҳеч нарсани англатмайди", — деб ёзган ва бу орқали Ямалнинг ўйин олдидан айтган гапларига ишора қилганди.

Иккинчи даврада эса "Барселона" "Реал"ни 2:0 ҳисобида мағлуб этиб, Испания чемпионига айланди.

Ламин Ямал жароҳати сабаб ўйнамаган бўлса-да, жамоа билан бирга бўлган. Учрашувдан кейинги куни у "Барселона"нинг иккинчи голидан кейинги хурсандчилик акс этган видеони жойлади.

Шу билан бирга, Ямал ҳам Беллингемнинг гапини такрорлаб: "Сўзлар ҳеч нарсани англатмайди", — деб ёзди ва постига кўзёшли эможиларни қўшди.