Ямал фонида кўринмай қолаётган Нико

Испания терма жамоасида ажойиб тандем ҳосил бўлган. Нико Уильямс ва Ламин Ямал яхши дўст, ёки ака-укадир. Уларни майдонда бир-бири билан комбинациялар орқали рақиб жарима майдончасига кириб боришини деярли кўрмайсиз, лекин иккиси ҳам Испаниянинг икки қанотини етарлича "ёндиришмоқда". Айниқса, бу "Евро-2024"да терма жамоалар учун етарлича муаммо бўляпти. Италия ва Хорватия, ана энди эса Грузия буни таъмини татиб кўрди ва турнирдан учала жамоа ҳам чиқиб кетишган. 

Нико 2002 йилда туғилган бўлиб, Инаки Уильямсни укаси ҳисобланади. Унда ҳам акасига сингари Гана терма жамоасини танлаш имкони бор эди, лекин "Атлетик" вингери "қизил фурия" учун майдонга тушишни истади. Ушбу турниргача Уильямс асосий таркиб футболчиси саналмас эди. Қатардаги ЖЧда Луис Энрике Дани Ольмодан ушбу позицияда ўйнашни сўради. Шу билан бирга, Микель Ойарсабаль ҳам бор. Аммо Де ла Фуэнте Никога ишонч билдиришдан қўрққани йўқ. У Евронинг биринчи туриданоқ бошланғич таркибга киритилди. 

21 ёшли вингер Грузияга қарши учрашувда жуда муҳим голни урган Родрига ассистентлик қилди. Сўнгги дақиқаларда эса ажойиб рейд уюштириб, ўйинга нуқтани қўйди. Қўшимча қилиб кетиш керак, ушбу баҳсда унинг паслари аниқлиги 100 фоизга тенг бўлди ва 4 та хавфли вазият ярата олди. Еврода 1980 йилдан бери бундай натижани ҳеч ким уддалай олмаётганди, дея хабар берди "Opta" нашри.

Гарчи Нико учун эътибор етарлича бўлса ҳам, матбуотда ундан кўпроқ Ламин гапирилади ва муҳокама қилинади. Бунга асосий сабаб албатта Ямалнинг ёши. У ҳали 17га ҳам кирмаган. Мактабни яқиндагина биритган болакай Еврода ўзидан 10 ёш катталардан кўрдим, демай ўтиб кетаётгани, ўз жамоадошларига 2 та ассист бериб, бу борада биринчи ўринга чиқиб олгани ақлга сиғмайдиган ишлар. Аммо Уильямс ҳам Испания учун етарлича фойдали ишлар қилмоқда. вингер Италияга қарши ўйиндаги ягона голнинг ҳам яратувчиси ҳисобланади. 

Уильямснинг нархи кундан кунга ошиб бормоқда. Ламин уни ўз клуби "Барселона"да кўришни истаётганини айтганди, лекин бу осон бўлмайди. Айниқса, "Атлетик" кундан кунга нархни ошираётган бир пайтда.