Ямал "ЖЧ-2026"нинг дастлабки ўйинларида камроқ майдонга тушиши мумкин

Испания терма жамоаси бош мураббийи Луис де ла Фуэнте жароҳатдан қайтган ёш ҳужумчи Ламин Ямални мусобақага аста-секин киритиб боришни маъқул кўрди. Чап оёғининг сон қисмида мушак жароҳати билан терма жамоа ихтиёрига келган футболчи 15 июнь куни Кабо-Вердега қарши гуруҳ босқичи 1-тур учрашувида майдонга 15–20 дақиқага туширилиши режалаштирилган. Бу ҳақда Sport.es нашри хабар берди.
 

Манба маълумотига кўра, Саудия Арабистонига қарши 2-тур баҳси (21 июнь)да Ямал учун 30 дақиқа атрофида ўйин вақти мўлжалланаётгани айтилмоқда. Шунингдек, 27 июнь куни Уругвайга қарши гуруҳ босқичи 3-тур учрашувида 18 ёшли ҳужумчи асосий таркибдан жой олиши эҳтимоли ҳам бор.
 

Аввалроқ, 11 июнь, пайшанба куни Ламин Ямал умумий гуруҳ билан тўлиқ машғулотларга киришгани хабар қилинган эди.