Яна бир футболчи жаҳон чемпионати ўйинига Канадага киритилмади

Кот-д’Ивуар терма жамоаси ҳужумчиси Элье Ваи жаҳон чемпионати гуруҳ босқичи иккинчи турида Германияга қарши учрашувда майдонга туша олмайди. GFFN хабарига кўра, 23 ёшли футболчига ўйин ўтадиган Канада ҳудудига кириш учун рухсат берилмаган.

Қарийб икки ҳафта олдин Ваи Францияда қўлга олинган эди. Тергов органлари мамлакат чемпионати доирасидаги "Ницца" – "Метц" учрашувини ўрганмоқда. Ушбу баҳсда Элье Ваи сариқ карточка олган, ўйинга эса жуда катта ва шубҳали миқдорда пул тикилгани маълум қилинган.

Шунга қарамай, ҳозирча футболчига расман айблов қўйилмаган. У коррупцияга қарши кураш бўлимида сўроқ қилинганидан сўнг жаҳон чемпионатида қатнашиш учун рухсат олган. Ваи АҚШда бўлиб ўтган биринчи тур учрашувида майдонга тушган эди.

Бундан аввал Канадага кириш рухсати Гана терма жамоаси футболчиси Томас Партига ҳам берилмагани маълум қилинган. У ҳам ҳозирда тергов доирасида экани айтилмоқда.