Yana bir hamyurtimiz prof boksda navbatdagi jangini o‘tkazadi

25 aprel kuni Rossiya Federatsiyasining Ufa shahrida joylashgan "Wrestling Palace" majmuasida IBA PRO 3 professional boks oqshomi tashkil etiladi.

Biz uchun ahamiyatlisi, turnir doirasida charm qo‘lqop ustamiz Havasbek Asadullaev ham ringga ko‘tariladi. Andijonlik 25 yoshli Havasbekka o‘sha kuni rossiyalik tajribali bokschi Alan Xugaev raqib bo‘ladi. Jang yarim o‘rta vazn toifasida tashkil etiladi.

Ma’lumot uchun, bu Asadullaev uchun professional boksdagi to‘rtinchi jang bo‘ladi. U bundan avvalgi barcha janglarida g‘alaba qozongan. Ikki jangida raqiblarini muddatidan avval mag‘lub etgan. 26 yoshli Alan Xugaev hisobida esa 19 ta g‘alaba bor. U g‘alabalarining 9 tasini muddatidan oldin qo‘lga kiritgan. Bu haqda O‘zbekiston professional boks federatsiyasi xabar bermoqda.