Yang: MYu Chempionlar ligasida g‘olib chiqishga qodir

"Manchester Yunayted" klubi himoyachisi Eshli Yang jamoasi Chempionlar ligasida g‘olib chiqishi mumkinligiga ishonmoqda.

“Albatta, biz Chempionlar ligasida g‘olib chiqishga qodirmiz. Musobaqada ishtirok etayotgan hech bir jamoa oldindan mag‘lubiyatni tan olmaydi. Biz o‘yindan o‘yinga kuchayib borishimiz kerak.

Bizning keyingi raqibimiz – “Sevilya”. Qiyin bo‘lishi aniq, lekin biz bor e’tiborimizni o‘z o‘yinimizga qaratishimiz lozim”, - deydi Yang Daily Mail nashriga bergan intervyusida.

Eslatib o‘tamiz, “Sevilya” hamda “Manchester Yunayted” klublari o‘rtasidagi bahs ertaga Toshkent vaqti bilan soat 00:45da boshlanadi.