Янгилик: Ўруновнинг “кетмони учди”...
Трансферларга ихтисослашган Transfermarkt порталида аксарият мамлакатларда чемпионатлари қатори Эрон Профессионал лигасида иштирок этган футболчиларнинг мавсумдаги иштироки асосида уларнинг янги нархларини эълон қилди.
Эрон чемпионатида мазмунли ўйинлари ва муҳим голлари билан “Персеполис”нинг чемпионга айланишига катта ҳисса қўшган Остон Ўрунов ушбу мамлакат профессионал лигасида трансфер нархи энг кўп кўтарилган футболчи бўлди.
Ўтган мавсумни “Набаҳор” чемпионатида якунлаган ҳужумкор футболчининг нархи бир миллион еврога баҳоланганди. Февраль ойида яна легионерга айланган ҳамюртимизнинг форслар заминида ўйини яна очилиб кетди.
Transfermarkt порталида экспертлари Остон Ўруновнинг трансфер суммасида кескин ўсиш кузатилгани ва нархи 1,5 миллион еврога ошганини қайд этди.
Эрон чемпионати вакиллари орасида энг катта ўсишга эришган Остоннинг трансфер суммаси бундан буён 2,5 миллион еврони ташкил қилади. 23 ёшли футболчимиз фаолияти давомида ҳали бу қадар ўсиш бўлмаганди.
Ўрунов Россия Премьер-лигасида “Уфа” сафида ўзини кўрсатиб, “Спартак” клубига трансфер қилинида энг юқори кўрсаткич – 1,5 миллион еврога баҳоланган эди.
Остон Ўрунов Эрон чемпионатида 13 та учрашувда майдонга тушиб, рақиблар дарвозасини олти маротаба ишғол қилди. Шунингдек, Ҳафзи кубогида иккита беллашувда биттадан гол ва ассист муаллифи бўлди.
Эрон чемпионати кумуш медаль совриндори Жалолиддин Машариповнинг трансфер суммаси ҳам ўзгарди. Тажрибали ҳужумкор футболчи нархи ошган ўйинчилар рўйхатидан жой олди.
“Истиқлол”га ўтганидан кейин ўйинида ижобий ўсиш кузатилган 30 ёшли легионеримиз нархига 200 минг евро қўшилиб, айни пайтда 1,7 миллион еврони ташкил қиляпти.
Машарипов Эронга кўчиб ўтганидан кейин 14 та баҳсда бир жуфт тўп киритди ва битта голли пас узатди. Ҳафзи кубогида бир маротаба майдонга тушди.
Ниҳоят, Эрон Про-лигасидаги учинчи вакилимиз Достон Турсуновга етиб келдик. Хузистоннинг “Истиқлол” клубига мавсумнинг иккинчи ярмида қўшилган легионеримиз жамоасининг юқори дивизиондаги ўрнини сақлаб қолишига катта ҳисса қўшди.
Бироқ 12 та баҳсда иштирок этган ҳамюртимизнинг трансфер нархида ўзгариш бўлгани йўқ. Достон Турсунов айни пайтда 500 минг еврога баҳоланмоқда.
Эслатиб ўтамиз, Остон Ўрунов ва Жалолиддин Машариповнинг Эрон етакчи клублари билан шартномаси яна бир йил давом этади. Достон Турсуновнинг хузистонликлар билан ҳамкорлиги 30 июнь куни якунланади.
Фикрлар