Файзуллаев Ўзбекистонда ўзидан зўр футболчилар борлиги айтди
Россия ИТАР-ТАСС ахборот агентлиги Ўзбекистон олимпия ва миллий терма жамоалари аъзоси, ЦСКА клуби ҳужумкор футболчиси Аббосбек Файзуллаевнинг фикрлари билан ўртоқлашди.
20 ёшли футболчимиз суҳбатда ўзбекистонлик футбол ишқибозлари билан муносабати ҳақида ҳам гапирди.
- Ўзбекистон ҳар доим ўз футболчилари ва легионерларини қўллаб-қувватлаб келади. Ўзимга ҳам Ўзбекистондан жуда кўп ёзишади. Бу менга ёқади.
Лекин ўзимни Ўзбекистоннинг энг машҳур футболчиси, деб ҳисобламайман. Бошқа ўйинчилар бор, - деди Аббосбек Файзуллаев.
Аббосбек Файзуллаев Россия Премьер-лигасида мавсумнинг асосий кашфиёти, деб топилди ва айни пайтда оммавий ахборот воситаларининг легионеримизга бўлган эътиборини янада кучайган.
Ҳамюртимиз ўтган йили августда “Пахтакор”дан ЦСКАга кўчиб ўтганидан кейин янги чемпионатга жуда тез мослашди.
Қисқа фурсатда “армиячилар”нинг етакчисига айланган истеъдодли футболчимиз жамоасининг ҳужумларини ташкил қилишда жонбозлик кўрсатди. ЦСКА ўзбек легионери ёрдамида лигада энг кўп тўп киритган жамоага айланди.
Пойтахт клуби мавсум давомида 30 та учрашувда рақиблари дарвозасини жами 56 маротаба ишғол қилди. Аббосбек Файзуллаевнинг ўзи тўртта гол ва 11 та ассист муаллифи бўлди.
Бундан ташқари, Аббос яна бир неча тўп киритилган вазиятда жамоадошларининг голли ҳужумларини ташкил қилиб берди.
Файзуллаевнинг ЦСКА билан амалдаги шартномаси 2026 йилнинг ёзигача имзоланган. Томонларда ўзаро келишув асосида ҳамкорликни яна бир йилга узайтириш ҳуқуқи бор.
Transfermarkt портали Файзуллаевни 5 миллион еврога баҳоламоқда. Аббосбек бу борада “Рома”га тегишли бўлган Элдор Шомуродов ва Туркиянинг “Бешиктош” жамоасида ўйнаётган қозоғистонлик ўзбек футболчи Бахтиёр Зайнутдинов билан бирга Марказий Осиёнинг энг қимматбаҳо ўйинчиси ҳисобланади.
Эътиборли томони, анча тажрибали ҳисобланган Шомуродов ва Зайнутдиновнинг трансфер нархи тушаётган бўлса, Файзуллаевники кескин кўтарилмоқда.
Фикрлар