Ярим аср кутилган чемпионлик қўлга киритилди
"Болонья" учун тарихий кубок. Сўнгги 51 йил ичида қўлга киритилган илк соврин бу — "Италия кубоги".
2025 йилнинг 15 май куни "Болонья" футбол клуби учун унутилмас санага айланди. Жамоа 51 йил кутган орзуси — Италия кубогини ниҳоят боши узра баланд кўтарди. Бу ғалаба оддий бир соврин эмас — бу йиллар давомида тўхтамаган орзу, фидойилик билан ёниб яшаган юраклар ва энг муҳими, садоқат тимсолидир. 1974 йилдан бери катта совринга зўриқиб яшаган минглаб "Болонья" мухлислари учун бу чемпионлик сабр-тоқат, ишонч ва садоқатнинг ғалабаси бўлди.
Жамоа финалда "Милан"ни 0:1 ҳисобида мағлуб этди. Ўйинда ягона голни Ндое 53-дақиқада миланликлар дарвозасига йўллаб, ўйиндаги ягона гол муаллифи ва "Болонья" жамоасининг қаҳрамонига айланди.
Қизиқарли жиҳати шундаки, финал баҳсидан атиги 6 кун аввал, яъни 9 май куни "Болонья" А Серия доирасида айнан "Милан"дан 3:1 ҳисобида мағлуб бўлган эди. Балки, ўша мағлубият ғалаба сари босилган энг катта қадам, Жамоанинг мураббийлар штаби ва футболчилари учун уйғотувчи сигнал бўлиб хизмат қилган десак, ёлғон бўлмайди.
"Болонья" 1930 йилларда Италия футболининг гигантларидан бири эди. Жамоа А Серияда 7 марта чемпионликни қўлга киритган, бироқ 1974 йилдаги Италия кубогидаги ғалабасидан сўнг улар узоқ вақт саҳна марказидан чекиниб қолди. Ушбу янги ғалаба эса клубга яна катта совринлар учун курашиш имконини берди.
Хулоса ўрнида шуни айтишимиз мумкинки, "Болонья"нинг Италия кубогидаги ғалабаси оддий бир ютуқ эмас, бу – орзулар рўёби, тарихий қайтиш ва сабрнинг мевасидир. Ярим аср кутилган бу соврин, клубнинг матонатини, фидойил футболчиларни ва ҳар қандай шароитда ҳам содиқ қолган мухлисларни юксак даражада тақдирлади. Бир неча кун олдин "Милан"дан енгилган жамоанинг финалда айнан шу рақиб устидан зафар қучиши эса футболнинг кутилмаган гўзаллигини яққол намоён этди. Бу ғалаба "Болонья" учун эмас, балки бутун футбол ихлосмандлари учун сабоқ – ҳеч қачон умидни йўқотмаслик керак.
Мафтуна Шокирова
Фикрлар