Яхши ўйнай олмасангиз "снайпер" сизга қаратилади, бир неча давлатлардан аниқ таклифлар бор, лекин..." - легионеримиз қайси йўлни танлайди?

2022 йилни Қозоғистон чемпионатида ўтказган ҳимоячимиз Одилбек Абдумажидов қўшни юртда ўзидан ёмон таассурот қолдиргани йўқ. “Ордабаси” шарафини ҳимоя қилган легионеримиз жамоасининг асосий таркибидан мунтазам жой эгаллашга муваффақ бўлди.

“Худога шукр, чемпионати тугатиб олдик. У ерда қизиқ бўлган тарафи шундаки, биринчи марта Кубокни қўлга киритдик. Энг эсда қоларли жиҳати шу бўлди”, - дея ширин хотиралар билан эслади, Абдумажидов.

Ҳамюртимизнинг “Ордабаси”да ўз ўрнини топгани ва маҳаллий мухлисларнинг ҳам ишончини қозона олган муҳим омиллардан бири. Зеро, бу унинг Қозоғистонда ўз устида жиддий ишлаганини англатади. Шу ўринда қизиқ савол: агар “Ордабаси” Ўзбекистон Суперлигасида қатнашса, қайси ўринлар учун курашган бўларди?

“Ўйлашимча, “Ордабаси” Ўзбекистон чемпионатида қатнашадиган бўлганида, бемалол 3 ёки 4-ўрин учун курашадиган жамоа бўларди. Агар чемпионлик учун курашади, десам катта гапириб юборган бўламан. Лекин юқорида таъкидлаганимдек, ҳеч бўлмаганда учталикка курашишга қурби етадиган клубга айланарди”, - дея жавоб қайтарди, Абдумажидов.

Одил фаолиятида илк бор ушбу мавсумни легионер сифатида ўтказди ва албатта ўзи учун кўп нарсаларни ўргангани аниқ.

“Легионер бўлиб тўп суришни барибир ўзига яраша кўп қийинчиликлари бўларкан, - дея мавзуни давом эттирди, Одил - Легионер бўлсангиз асосий урғу фақат сизга берилади. Айниқса, клуб ва мухлисларнинг эътибори катта бўлади. Яхши ўйнаб кетсангиз, тезда барчанинг эътиборига тушасиз. Агар жамоага ёрдам бера олмасдан, ўзингизни кўрсата олмасангиз “снайпер” сизга қаратилади (кулади). Шу томонлама қийинчилиги бўлади. Легионер сифатида фаолият олиб борсангиз кўп нарсани қадрига кўпроқ етадиган бўласиз. Қийинчиликларни кўриб, уларни енгиб ўтишни ўрганасиз”.

Абдумажидовнинг кейинги режаси қандай? У янги мавсумда қайси жамоа шарафини ҳимоя қилади? “Ордабаси”да қоладими ёки “Металлург”га қайтадими? Боиси, футболчи ҳуқуқий жиҳатдан бекободликларга тегишли.

“Металлург” клуби билан икки йиллик шартномам бор. У ердан ҳам таклиф йўқ эмас. Ҳамма нарса ўзаро келишишга боғлиқ. Нима бўлишини кўрамиз. Худони айтгани бўлади”, - дея жавоб қайтарди, футболчи.

Айтмоқчимизки, Одилжон Абдумажидов яна легионер сифатида тўп сурмоқчими? Бу борада футболчимизга қайси мамлакатлардан қизиқишлар бор? Бу масалада у шундай деди:

“Ҳамма футболчини нияти легионер сифатида тўп суриш. Боя айтдим, “Металлург” билан амалда шартномам бор. Насиб қилгани бўлади-да. Бир неча давлатлардан аниқ таклифлар бор. Аммо қачонки, шартнома тузилса, ана шунда эълон қилсак тўғри бўларди. Ҳозир айтмай турганим яхши. “Металлург” билан амалда шартномам борлиги учун бошқа таклифларни ошкор қилсам тўғри бўлмайди, деб ўйлайман”, - дея фикр билдирди, Абдумажидов.

Шуҳратбек Жўраев.