Юбилей ўйинида жароҳат олган Нойер

"Бавария" Чемпионлар лигаси нимчорак финалининг биринчи баҳсида "Байер"ни ўз майдонида қабул қилиб, йирик 3:0 ҳисобида ғалаба қозонди. Ушбу ўйинда Мануэль Нойер жароҳат олди. 

Учрашувнинг 54-дақиқасида Нойер Жамал Мусиаланинг урган голини нишонлаш пайтида жароҳат олиб, 58-дақиқада алмаштирилди. Унинг ўрнига 21 ёшли  Йонас Урбиг майдонга тушди. Шу билан бирга, кипер "Бавария"даги дебютини амалга оширди. 

Ушбу ўйин Нойер учун Чемпионлар лигасидаги 150-баҳс эди. Яна битта учрашувдан кейин дарвозабон бу борада Тони Кроос ва Хавига етиб олади. Шу ўринда эслатиб ўтиш керак, ЕЧЛда энг кўп ўйин ўтказган германиялик футболчи бу Томас Мюллер (160).

"Ҳозирча Мануэлнинг ҳолати бўйича аниқ маълумотим йўқ. Менимча, у бузоғидан жароҳат олган. Аммо у голни нишонлаш пайтида лат егани рост", - деди Венсан Компани. 

Мураббий Урбиг ҳақида ҳам гапириб ўтди: " У дебютини бундан осонроқ учрашувлардан бирида нишонлаши мумкин эди. Аммо Йонас биз билан биринчи ойларининг ўзидаёқ ҳотиржам эканлигини кўрсатди. Бу мавсум Нойерсиз ҳам ўйнашимизга тўғри келди. Буни яна амалга оширишимиз керак". 

Эслатиб ўтамиз, Урбиг мазкур қишки трансферлар ойнасида "Кёльн"дан "Бавария"га 7 миллион евро эвазига кўчиб ўтган. Германиялик посбон жамоа билан 2029 йилгача амал қиладиган шартнома имзолаганди.