Юран Ўруновнинг ёши урилганини исботламоқчи

Ўтган йилнинг охирида “СКА-Хабаровск” бош мураббийи Сергей Юран оммавий ахборот воситаларидаги чиқишида “Спартак”нинг ўзбекистонлик легионери Остон Ўруновнинг ёши 4-5 йилга кичрайтирилгани ҳақида бонг урган эди.

Бу масала катта шов-шув ва эътирозлар келтириб чиқарди. Остон Ўрунов ўйнаган “Уфа” ва ҳозирги жамоаси “Спартак”, шунингдек, Ўзбекистон футбол ассоциация Юраннинг иддаоларига ўз муносабатини билдирди, раддиялар берилди, исбот талаб қилинди ва россиялик мураббий расман узр сўраши кераклиги айтилди.

Бу можаро журналистлар эътиборидан четда қолгани йўқ. Ҳатто, мустақил журналистлар ҳам масалани тўлиқ ўрганиб, ўзбек футболчисининг ҳужжатлари архивлардан текширилгани ва унинг ёши кичрайтирилмаганини исботлади.

Бироқ, таъкидлаш лозимки, бу хатти-ҳаракатлар Сергей Юранни Ўруновнинг ёши борасидаги фикрини ўзгартиргани йўқ. Сергей Юран бу мавзу чуқурлашиб кетганидан кейин у ўзбекистонлик ҳамкасблари билан гаплашиб туриши ва айнан улар Ўруновнинг ёши кичрайтирилгани ҳақида маълумот берганини айтиш билан чекланди холос.

Аслида ўз иддаосини исботлаб бериши керак бўлган Юран, унга Ўруновнинг ёши ўзгартирилмагани ҳақида келтирилган фактларни қабул қилмагани маълум бўлди. Нима ҳам дердик, тажрибали мураббий фактлардан кўра, айрим ҳамкасблари айтган гарларга ишонар экан. Бу унинг танлови, мажбурлаб бўлмайди.

Юран ва Ўруновга доир бу иш Россия футбол иттифоқининг Этика қўмитаси томонидан ҳам кўриб чиқилди.  Сергей Юран кўтарган мавзу бўйича ўз текширувини ўтказган ташкилот россиялик мураббийга жазо қўллади. Россия футбол иттифоқи Этика қўмитаси қарорига кўра, Сергей Юран Остон Ўруновнинг ёши кичрайтирилгани ҳақида далил-исботсиз маълумотларни иддао қилгани учун 250 минг рубль миқдорида жарима тўлайдиган бўлди.

Ўшанда, Россия футбол иттифоқи Этика қўмитаси аъзоси Андрей Созин бу масала бўйича ўтказилган йиғилишда Сергей Юраннинг ўзи ҳам қатнашгани, бироқ айбини тан олмагани ва қилмишини тўлалигича ҳис этмаганини таъкидлаган эди.

Таслим бўлишни истамаган Сергей Юран куни кеча Этика қўмитаси қарорига аппеляция берганини маълум қилди. Демак, у жазодан норози ва ҳамон Ўруновнинг ёши урилганига ишонмоқда ва гўё буни исботламоқчидек.

- Табиийки, Этика қўмитаси қарорига апелляция бердим. Унинг кўриб чиқиш санасини ҳали эълон қилишмади. Юристим доимий алоқада ва у керакли ишларни қилмоқда, - деди Сергей Юран.

Ҳужжатларга кўра, Остон Ўрунов 2000 йилнинг 19 декабрь куни Навоийда туғилган. “Пахтакор” футбол клуби тарбияланувчиси. 2017 йилдан бошлаб, “Навбаҳор” клуби шарафини ҳимоя қилган. У айнан Наманганда профессионал футболчи сифатида шаклланди. Водий жамоасида жами 51 та ўйинда қатнашиб, рақиблар дарвозасига учта гол урди.

Истеъдодли ярим ҳимоячи 2019 йилнинг июлида Тошкентнинг “Локомотив” жамоасига қабул қилинди. Пойтахт “темирйўлчилари” сафида 13 та ўйинда рақиб дарвозасини бир маротаба ишғол қилди.

2019 йилнинг 2 июнида Туркияга  қарши ўтказилган халқаро ўртоқлик учрашувида Ўзбекистон миллий терма жамоасидаги дебютини нишонлади. Кейин КХДР, Сурия ва Ироқ терма жамоаларига қарши ўтказилган учрашувларда ҳам майдонга тушди.

Остон Ўрунов 2020 йилнинг февралида “Уфа”га кўчиб ўтди. Уфаликлар таркибида ўнта учрашувни юқори даражада ўтказган истеъдодли ярим ҳимоячи ёзги трансферлар вақтида “Спартак” билан беш йиллик шартномага имзо чекди.

Айни пайтда Остон Ўрунов “Спартак” билан бирга Бирлашган Араб Амирликларидаги ўқув-машғулот йиғинларида мавсумга тайёргарлик кўрмоқда.

“Спартак” легионерини сотмоқда. Бундан Ўруновга фойда борми?