Зафармурод Абдираҳматов: Қатардаги Осиё кубогини эслашни истамайман!

Ўзбекистон терма жамоаси ва "Насаф" клуби футболчиси Зафармурод Абдурахматов Sports.uzга интервью берди.

"Насаф"ни 3 сўзда таърифлаб беринг!

"Авваламбор, Ассалому алайкум! Мени интервьюга таклиф қилганизга учун сизга рахмат айтаман. Бундан жуда хурсандман. Биринчи саволизга жавоб берадиган бўлсам, "Насаф" жамоасини 3 та сўз билан таърифлаб беришнинг иложи йу‌қ. Лекин тарифлаш мажбурий бўлса, "Насаф"га ўхшаши йўқ" деган бўлардим.

Рўзиқул Бердиевнинг фаолиятингизда тутган ўрни қанчалик муҳим?

Албатта, менинг футболчилик фаолиятимга  Рўзиқул Бердиевнинг қўшиб  келаётган ҳиссаси жуда катта. Ҳозирда ҳам ўзларинг ҳиссаларини қу‌шиб келмоқдалар. Чунки катта футболга ўтишимга асосий сабабчи бўлган инсонлардан бири ҳисобланади.

2024 йилда бутун Қашқадарё кутган тарихий чемпионликка эришилди. Мана шу чемпион таркибда сиз ҳам борсиз. Бу қайсидир маънода омадми? Жамоанинг бир бўлаги сифатида ўзингиздан қанчалик кўнглингиз тўлди? 

Қашқадарё аҳли учун 2024 йил ажойиб келди. Чунки қашқадарёликлар 27 йил кутган чемпионлик айнан шу йилда содир бўлди. Суперлига бош совринини қўлга киритишда ўзимни озми-кўпни хиссамни қўшаганимдан жуда хурсандман. Бу ҳар бир футболчига ҳузур бахш  этади. Бироқ ўтган мавсумдан унчалик кўнглим тўлмади. Сабаби баъзи бир ўйинларни жароҳат туфайли ўтказиб юбордим.

Сиз яна бир тарих ёзилишида ўз ҳиссангизни қўшдингиз. Ўзбек футболи тарихида Тимур Кападзе бошчилигидаги Ўзбекистон У23 терма жамоаси Олимпидада иштирок этди. Бу қанақа ҳиссиётлар берди?

Албатта, ҳар бир футболчи учун Олимпиадада иштирок этиш фахр туйғусини уйғотади.Чунки буни биз кўп йиллардан бери орзу қилардик ва бу орзуни амалга оширдик. Бу ҳиссиётларни сўз билан таърифлашнинг имкони йўқ.

2024 йилда жуда зич тақвим ўтказдингиз.  Дастлаб, терма жамоа билан Осиё кубогига бордингиз. Кейинчалик Париж Олимпиадаси йўли босиб ўтилди. Йил сўнгида жамоа билан чемпионлик!

Йўқ, 2024 йилда зич тақвим ўтказдим, деб ўйламайман. Бу ҳар бир футболчида бўладиган нарса. Буларнинг ҳаммаси ўзим учун фақат фойда. Терма жамоа билан Осиё кубоги, Олимпиада ва "Насаф" билан чемпионлик - буларнинг ҳаммаси ажойиб ҳис-туйғу беради. 

Рўзиқул Бердиев ва Тимур Кападзе қўл остида ўйнагансиз. Икки мутахассиснинг қандай фарқлари ва ўхшашликлари бор?

Фаолиятим давомида Рўзиқул Бердиев ҳамда Темур Кападзе қўл остида бирга ишлаганман. Ҳозирда  ҳам бирга ишлаб келяпман. Иккаласи ҳам  ўзига хос мураббий саналади. Улар Ўзбекистоннинг энг яхши мутахассисларидан ва улар билан ишлаш ҳар доим фахр. Уларнинг қўл остида шуғулланган ҳар бир футболчи ўсишга эриша олади. Бу иккала мураббийнинг ҳам ўзининг қарашлари бор, ўзининг фикрлари ва принсиплари мавжуд. Албатта Кападзе ва Бердиев қўл остида шуғулланиш менга  жуда ёқади.

У-20даги ёрқин ўйинларингиз сабаб Сречко Катанец сизни илк марта Ўзбекистон МТЖга чақирган эди ва Қатарга олиб кетди. Мазкур турнирда сиз кўпчилик кутган захира ўриндиғидаги асосий ролда эмас, бир қанча муҳим ўйинларда ўйнадингиз. Ушбу мусоабақани бир ёдга олсангиз?

Миллий терма жамоа билан бўлган Қатардаги Осиё кубогини  унчалик эслашни хоҳламайман. Чунки, мен у турнирда ўзимга керакли бўлган сабоқларни олиб бўлдим ва ўзимга етарлича тажриба орттиришга эришдим.

Сизга терма жамоа эшикларини очган Катанец ҳақида нима дея оласиз? 

Қатардаги турнирда жамоа бош мураббий бўлган Сречко Катанец ҳақида гапирадиган бўлсам, Сречко билан ишлаш мен учун жуда ёқимли бўлди. У билан кўп ишламаганман. Бироқ у ажойиб мутахассис. Ўз ишининг усталаридан бири ҳисобланади.

Айни дамда Катанец терма жамоадан кетди. Унинг ўрнига келган Кападзе билан олдин ишлагансиз. Умуман Кападзе билан билан йиғин қандай бўлди?

Иордания давлатида  ташкил этилган йиғинда дастлаб биз Катанецнинг  қўл остида йиғилишимиз  керак эди. Афсуски, уни  ўзи иштирок этмаган бўлсада. Кейинчалик бизга  соғлигидаги муаммолари туфайли унинг мазкур  йиғинга келмаслигини айтишди.

Ундан сўнг эса терма жамоа мураббийлигидан кетганлиги маълум бўлди. Катанецнинг кейинги ишларига  омад тилаб қоламиз. Унинг ўрнига Темур Кападзе бош мураббий этиб тайинланди. Кападзе билан бирга йиғинни давом эттирдик ва йиғин яхши ўтганлиги таъкидлашим керак. Иордания терма жамоаси билан бўлган ўйин ҳам ўзига яраш қийин кечди. Уларга муносиб тарзда қаршилик кўрсатдик.