Замонавий бешкураш. Алисе Фахрутдинова Испания йиғинида

Замонавий бешкураш бўйича Ўзбекистон терма жамоаси аъзоси, Токио-2020 Олимпиадаси иштирокчиси Алисе Фахрутдинова айни пайтда янги мавсумга тайёргарлик кўрмоқда. Машғулотлар Испанияда ўтказиляпти. Бу ҳақда Ўзбекистон Миллий Олимпия қўмитаси матбуот хизмати хабар тарқатмоқда.

Манбага кўра, 20 январь куни бошланган йиғин 8 февраль кунигача давом этади. Унда мезбонлардан ташқари Чехия, Германия, Латвия ва Грузия терма жамоаларининг бешкурашчилари, шунингдек, бир қатор қиличбозлар ҳам қатнашмоқда.

Машғулотларда кўпроқ қиличбозлик йўналишига аҳамият қаратилиб, тактик ҳаракатлар, қолаверса, усулларнинг техник ижросини мустаҳкамлашга эътибор берилмоқда.