"Заря"нинг таниқли устози: "Биламанки, "Андижон" Ўзбекистон Кубогини ютган, ўз даврида Шквирин билан бирга ўйнаганман"

Куни кеча Украина премьер лигаси вакили ҳисобланган Луганскнинг “Заря” жамоаси Анталия йиғини доирасида “Андижон”га қарши ўртоқлик учрашувида майдонга тушди.

0:0 ҳисобида якунланган ўйиндан кейин “Заря” клубининг бош мураббийи, украиналик таниқли мутахассислардан бири ва ўз вақтида Германиянинг “Вердер” жамоасини ҳам бошқарган мутахассис Виктор Скрипник бир қатор саволларга жавоб қайтарди.

- Виктор Анатольевич, аввало “Андижон”га қарши бўлиб ўтган учрашув тўғрисидаги фикрингизни билмоқчиман. 0:0 ҳисоби ўйинга мос бўлдими?

- Мен учун бу ўйин аввало машғулотларда берган юкламамизни жамоамиз қандай бажариши эканлигини кўриш жуда муҳим эди. Шунинг учун биз аралаш таркиб билан 45 дақиқадан ўйнадик. Ўйинга келадиган бўлсак, тенг курашлар остида ўтди ва дуранг натижа адолатли бўлди.  

- Рақиб жамоадаги қайси футболчи сизга кўпроқ ёқди?

- Ҳеч кимни хафа қилмоқчи эмасман. Лекин йиғинларда асосан ўз жамоамни кўпроқ кузатяпман.

- Бунгача “Андижон” ҳақида қандай маълумотларни билардингиз?

- Мен биламанки, сизни жамоангиз Ўзбекистон Кубогини ютган ва Осиё Чемпионлар лигаси 2 да иштирок этган. Яхши ўйнай оладиган ва рақобатбардош жамоа.

- Охирги марта қачон ўзбек клубига қарши ўйнадингиз ёки “Андижон” билан баҳс бу сиз учун биринчисими?

- СССР чемпионатининг биринчи лигасида тўп сурганимда Тошкентнинг “Пахтакор” жамоасига қарши ўйнаганман. Ҳа, СССРнинг охирги чемпионатида  олий лигада ўйнаганман. Мен мураббий сифатида кечаги баҳсда биринчи марта ўзбек жамоасига қарши ўйнадим. Ўйлайманки, бу охиргиси бўлмайди.

- Украинада катта номга эга бўлган Максим Шацких ўтган йили айнан “Андижон”ни бошқарган...

- Максим билан шахсан таниш эмасман. Лекин уни Киевнинг “Динамо”сида ва ўз миллий терма жамоасида тўп суриб яхши ном қозонганидан хабарим бор.

- Ўзбекистон терма жамоасининг жаҳон чемпионатидаги имкониятларини қандай баҳолайсиз?

- Бу борада баҳо беришим қийин. Лекин мухлислар ва биз ишонамизки, ҳаммаси яхши бўлади ва терма жамоангиз жаҳон чемпионатида муносиб қатнашади.

- Ўзбек футболи ёки ўзбек ҳаёти билан боғлиқ бирор хотирангиз борми?

- Албатта, интернерт орқали машҳур инсонлар ҳақида ўқиб тураман. Лекин ҳар бир авлоднинг ўз қаҳрамонлари бўлади. Ўз даврида Игорь Шквирин билан бирга ўйнаганман. У юқори даражадаги ҳужумчи бўлган.

- Бизнинг чемпионатда мураббий сифатида ўзингизни синаб кўриш истагингиз ҳам борм?

- Ҳеч нарсани истисно қилиб бўлмайди. Олдиндан башорат қилиш ҳам тўғри эмас. Барчасини кўрамиз. Мен юртимизда тинчлик бўлишини жуда ҳам истайман. Шунда ҳаёт ҳам изга тушади ва футбол янада яхшироқ бўлади.