Зидан боши берк кўчага кириб қолди

SPORTS.uz Ла Лиганинг марказий баҳси – «Реал» ва «Атлетико» тўқнашуви борасида фикр алмашади.

Энди нима бўлади?

Жуда муҳим баҳс олдидан Зидан марказий ҳужумчисиз қолиб кетди. Карим Бензема лазаретда бўлса, Мариано Диас жароҳат олди. Лука Йовични «Айнтрахт»га ижарага бериб юборган жамоа қийин аҳволга тушиб қолди. Энди асосий жамоага «Кастилья»дан ҳужумчи жалб этиш лозим, аммо бундай муҳим баҳсда тажрибасиз ёш футболчиларга суяниш бироз ноўрин.

Шу боис, "Мадрид дербиси"да ҳужум чизиғида кўриниш бериши мумкин бўлган футболчи номи барчани қизиқтирмоқда. Испан нашрларининг маълум қилишича, Зидан Марко Асенсио, Родригодан фойдаланиши мумкин. Шунингдек, Иско ҳам «ёлғон тўққизлик» позициясида майдонга тушиши мумкин. «Реал» жароҳатлар сабабли чемпионатнинг энг муҳим баҳсида ноодатий ротацияга қўл уриши керак.

"Марcа" нашри берган хабарларга қараганда, Мариано бу мавсумда «Реал» сафида жароҳат олган 42-футболчи. Бу борада Дани Карвахаль, Эден Азар, Серхио Рамос, Федерико Вальверде ва Эдер Милитао яққол пешқадамлик қилмоқда. Шунингдек, Родриго ҳам бир неча бор сафдан чиққан.

Клуб сафида мавсумни жароҳатсиз ўтказаётган футболчилар саноқли. Украиналик посбон Андрей Лунин, Ферлан Менди, Каземиро ва кутилмаганда Винисиус! Тўғри, Казермиро COVID-19 юқтириб олгани учун бир муддат сафдан чиқди, аммо қолганлар барча панд бергани йўқ. Жароҳатлар сабабли Зинедин Зидан ЕЧЛ учрашувларида ҳам «Кастилья»да футболчиларни жалб қилишга мажбур бўлди. «Аталанта»га қарши ўйинда мураббий Серхио Аррибас ва Дурони асосий таркибда майдонга ташлади. Захирада эса, Чуст, Гутеррес, Бланк ова Альтубелар бор эди. Рауль жамоаси ёшлари ёмон таассурот қолдирмади, аммо гранд клуб даражасини тажрибасиз ёшлар билан ушлаб қолиш имконсиз.

Жароҳатлар борасидаги суриштирув натижаси

Жорий мавсумда «Қироллик клуби» футболчилари умумий ҳисобда 823 кунни жароҳатлар сабабли ўтказиб юборишга мажбур бўлди. 42 та жароҳатнинг таъсири ўз кучини кўрсатгани аниқ. Агар ўтказиб юборилган ўйинлар сони умумий ҳисобланса, мухлислар ҳайрон қоладиган рақамлар келиб чиқиши аниқ. Март ойига қадар барча футболчилар ўтказиб юборган учрашувлари сони 146 тани ташкил этмоқда.

Ўйинларни ўтказиб юбориш ва жароҳат олган футболчилар борасида «Реал» Испанияда мутлақ етакчи. «Қаймоқранглилар»дан кейинги ўринни Каталониянинг «Барселона» клуби эгаллаб турибди. Рональд Куман шогирдлари 28 бор сафдан чиққан.

Зидан ғазаб отига минган бўлсада, журналистлар билан мулоқот жараёнида ўз ҳиссиётларини яширишни уддалай олади. Сўнгги пайтларда франциялик мутахассис ўз тактикасини ўзгартирган кўринади. У ҳатто ўз истеъфоси ҳақида берилган саволларга ҳам жароҳатлар ҳақидаги жумлалар билан жавоб бермоқда.

«Тўғриси, таркибимиздаги йўқотишлар сони ортиб кетгани мени хавотирга солмоқда. Шунга қарамай, бу баҳона бўлмаслиги керак. Доимо ғалаба учун тўп суришимиз шарт».

Мураббий кадрлар билан юзага келаётган муаммоларни бартараф этиш мақсадида алоҳида комиссия тузди. Клуб бош директори – Хосе Анхель Санчес билан биргаликда Зидан жароҳатларнинг асосий сабаби нимада эканлигини аниқламоқчи. Нима бўлган тақдирда ҳам, бу комиссия айтарли фойда бермаслиги аниқ. Ҳозир гранд клубларнинг барчаси шу муаммога дуч келмоқда. Пандемиядан сўнг старт олган мавсум барча режаларни барбод қилиб юборди.

Жароҳатлар учун ким айбдор?

Мавсум кичик танаффус билан бошланганида Дани Карвахаль тақвимни кескин танқид қилган эди. Унинг сўзлари башорат эканлигини энди англаб етиш мумкин:

«Футболчиларга бу мавсумда жуда ҳам оғир бўлади. Бизда мавсумлар орасида тикланиб олиш учун вақт жуда кам бўлди. Энди бутун йил давомида ортиқча юклама билан ҳаракат қилиш керак. Шундай экан, жароҳатларни четлаб ўтишнинг имкони йўқ».

Ушбу суратда «Реал»нинг ҳар бир ўйинида дуч келган кадрлар муаммоси акс этган.

Давом этаётган футбол мавсумида Эден Азар билан биргаликда Дани Карвахаль ҳам ўйинларни ўтказиб юбориш борасида рекорд ўрнатмоқда. Ваҳоланки, у муаммонинг бир бўлаги, холос. Айниқса, терма жамоалар йиғини бошлангач, нафақат «Реал»да, балки бошқа гранд клубларда ҳам жароҳат олганлар сони 2 баробар ортиб кетди. «Реал» жароҳатлар борасидаги таъқибчиси «Барселона»дан нисбатан камроқ ўйин ўтказган. Жамоа Кубок баҳсини эрта тарк этгани учун тақвимда рақибларидан кўпроқ дам олиши кўрсатилган.

Соддароқ қилиб айтсак, клуб ЕЧЛни инобатга олмаганда, ҳафтасига бир бор майдонга чиқиб келмоқда. Шундай экан, жароҳатлар бобидаги барча саволлар жамоанинг жисмоний ҳолатига жавоб берувчи Грегори Дюпонга берилиши керак. Эътиборлиси шундаки, Дюпон бундан аввал ҳам шундай вазиятга тушиб қолган. Мутахассис жуда ҳам ёпиқ шахс. У интервьюлардан қочади ва ўз иш методикаси билан бўлишмайди.

Мутахассис ўз режалари асосида иш олиб бораётганини айтди, холос. Қолган барча муаммоларни дам олиш учун деярли имкон бўлмаганига йўйди. "Мадрид дербиси" жуда муҳим. Сабаби, ўртага чемпионлик тикилган. Каталониянинг «Барселона» клуби ҳам мухлислик қиладиган учрашув олдидан «Реал»да марказий ҳужумчи йўқ. Зидан ва унинг штаби бу вазиятдан қандай чиқиб кетаркин?! Буни бугун бўлиб ўтадиган "Мадрид дербиси"да билиб олишимиз мумкин.