Зидан яна Роналдуга устозлик қилади

ПСЖ катта эҳтимол билан ёзда Маурисио Почеттинонинг жавобини бериб, ўрнига ишсиз юрган Зинедин Зиданни олиб келади. Аввал бир неча маротаба Зидан Париж келубини бошқаришга розилик бергани ҳақида хабарлар тарқатилган эди.

Ўз навбатида, Криштиану Роналдунинг яқин келажакдаги режаларида ПСЖ варианти ҳам йўқ эмас.

Marca ва Daily Mirror нашрининг хабарига кўра, Зидан “Пари Сен-Жермен”ни қабул қилиб олиши билан клуб раҳбариятидан Роналдунинг трансферини сўрашни мўлжалламоқда. Чунки франциялик мутахассис “Реал”да португалиялик юлдуз билан бирга муваффақиятли ишлаган.

Роналдунинг манчестерликлар билан амалдаги шартномаси 2023 йилнинг ярмигача тузилган. Бироқ, Криштиануга жамоадаги муҳит ва ўйинчиларнинг салоҳияти унчалик маъқул келмаяпти. Агар Рангник шогирдлари мавсум охирида Чемпионлар лигасига йўлланмани қўлга кирита олмаса, дунёнинг энг зўр тўпурари ёзда клубни тарк этишини маълум қилган.

Криштиану жорий мавсумда Англия прнемьер-лигасида 18 та учрашувда рақиблар дарвозасини 8 маротаба ишғол қилди. Чемпионлар лигасининг гуруҳ босқичида бешта ўйинда ўз ҳисобига олтита гол ёздириб қўйди.