Yana bir afsona Gollandiya terma jamoasini tark etdi (FOTO)

Gollandiya terma jamoasi yarim himoyachisi Uesli Sneyder kecha Peruga (2:1) qarshi o‘tkazilgan o‘rtoqlik uchrashuvida ishtirok etdi.

34 yoshli “Al-Garafa” futbolchisi maydonda 62 daqiqa harakat qildi. E’tiborlisi, ushbu bahs Sneyder uchun Gollandiya terma jamoasi safidagi so‘nggi uchrashuv bo‘ldi.

Ma’lumot uchun, Sneyder Gollandiya termasi safida 2003 yil 18 yoshida debyut qilgan edi. U o‘tgan davr mobaynida terma jamoasi bilan birga 2004 yil Evropa chempionati bronza medalini, 2010 yilgi jahon chempionatida kumush medalni va 2014 yilgi mundialda bronza medalni qo‘lga kiritdi.

U Gollandiya terma jamoasida eng ko‘p o‘yin o‘tkazish bo‘yicha rekordchi hisoblanadi – 134ta. Sneyder ushbu bahslarda raqiblari darvozasini 31 marta ishg‘ol etgan.