“Barsa” kutgan to‘purar “Arsenal”ni tanladi

“Atletiko Madrid” hujumchisi Xulian Alvares ko‘pchilik kutganidek “Barselona”ga o‘tishni istamadi va yana Angliya Premier-ligasiga qaytish variantini tanladi.

TEAMtalk nashri xabar berishicha, Angliya Premier-Ligasida peshqadamlik qilayotgan Londonning “Arsenal” klubi vakillari 26 yoshli argentinalik hujumchining agentlari bilan yopiq muzokaralar o‘tkazdi.

Manba ma’lumotiga ko‘ra, har ikki tomon o‘zaro hamkorlik bo‘yicha bir to‘xtamga kelgan va Alvaresning “Arsenal”ga o‘tishi deyarli hal bo‘lgan masala, deb hisoblanmoqda.

“Barselona” va “Chelsi” tomonidan qiziqish bo‘lishiga qaramay, “Arsenal” transfer masalasida tezroq amaliy harakatlarni amalga oshirdi, bu esa klubga muzokaralarda muvaffaqiyatga erishish imkonini berdi.

Bitimning muvaffaqiyatli yakunlanishidagi asosiy omillardan biri — “Arsenal”ning Alvares va “Atletiko Madrid”ning barcha talablarini qondirishga tayyorligi bo‘ldi.

Bu moliyaviy shartlar hamda o‘yinchilarni muammosiz ro‘yxatdan o‘tkazishni ta’minlashni ham o‘z ichiga olgan bo‘lib, bu holat “Chelsi” va “Barselona” uchun qiyinchilik tug‘dirishi mumkin edi.

Manba ta’kidlashicha, Alvares “Arsenal” taklifini mamnuniyat bilan qabul qilgan, chunki u ancha vaqtdan beri Angliyaga qaytib, sovrinlar uchun kurashishni orzu qilayotgan edi.

Joriy mavsumda u Atletiko Madrid safida 44 ta o‘yin o‘tkazib, 17 ta gol urdi va 9 ta golli uzatma amalga oshirdi.

Futbolchining klub bilan shartnomasi 2030 yilning yarmigacha amal qiladi, Transfermarkt ma’lumotiga ko‘ra uning bozor qiymati 90 million evroni tashkil etadi.