“Barsa”ga umuman qaytmayman!

“Barselona” klubining sobiq bosh murabbiyi Xavi Ernandes  yaqinda bergan intervyusida kelajakda Kataloniya klubiga qaytishi mumkinligi haqidagi savolga javob berdi.

- Mening “Barsa” bosh murabbiyi sifatidagi tarixim hozirgi qarashlariga ko‘ra tugagan. Men Kataloniya klubiga umuman qaytmayman, - dedi ispaniyalik mutaxassis La Vanguardia gazetasiga bergan intervyusida.

Eslatib o‘tamiz, Xavi “Barselona”ni 2021-2024 yillar davomida boshqargan. Bu vaqt mobaynida Xavi murabbiy sifatida klub bilan Ispaniya chempionligi va Ispaniya Superkubogini qo‘lga kiritgan.

Yaqinda tarqalgan mish-mishlarga ko‘ra, hozircha ishsiz yurgan mutaxassis yozda bo‘ladigan  jahon chempionatidan keyin Marokash terma jamoasida ish boshlashi mumkin.

“Barselona”dan oldin Xavi o‘zi o‘ynagan Qatarning “As-Sadd” klubida bosh murabbiy sifatida ishlagan.