Denis Korostichenko: "Bizning jamoa ham teng darajada o‘ynay olishini ko‘rsatdi"

Superligada 24-tur o‘yinlari start oldi. "Olimpik" bu tur safarda OKMKga qarshi bahs olib bordi va 2:2 hisobida durang o‘ynadi. O‘yindan keyingi matbuot anjumanida "Olimpik" bosh murabbiyi Denis Korostichenko quyidagilarni aytdi:

"Birinchi navbatda yigitlarga bugungi qilingan mehnati uchun tashakkur. Medallar uchun kurashayotgan jamoa bilan to‘p surish oson emas. Ularning tarkibida yuqori darajadagi ijrochilar bor. Bizning jamoa ham bugun teng darajada o‘ynay olishini ko‘rsatdi.

Jangovar futbol ko‘rdik. Ikki tomon ham g‘alaba qozonishi mumkin edi. So‘nggi daqiqalarda gol o‘tkazib yuborganimiz alam qildi, ammo natija adolatli".