Endi Raul va Kasilyasdan so‘ng uning ismi yangraydi

“Real” yarim himoyachisi Vinisius Junior kecha La Liganing 25-turidan o‘rin olgan “Real Sosedad”ga (1:1) qarshi o‘yinda zaxiradan maydonga tushdi va gol urib, jamoasini mag‘lubiyatdan qutqarib qoldi.

Braziliyalik futbolchi uchun ushbu o‘yin “qirollik klubi” safidagi yubiley 100-o‘yin bo‘ldi. Shu tariqa u “Real” safida 100 ta o‘yin o‘tkazgan eng yosh futbolchilar kuchli uchligiga kirdi. 20 yosh 232 kunlik paytida yuzlik dovonni zabt etgan Vinisius ushbu o‘yinlarda o‘z hisobiga 13 ta gol hamda 20 ta golli uzatma yozdirib qo‘ygan.

“Real” safida 100 ta o‘yin o‘tkazgan eng yosh futbolchi Raul (19 yosh 177 kun) hisoblanadi. Undan keyingi o‘rinda Iker Kasilyas (20 yosh 125 kun) qayd etilgan.