Eng qari futbolchi 59 yoshida gol urdi

59 yoshga kirgan Kazuyoshi Miura — dunyodagi eng keksa professional futbolchi — deyarli to‘rt yillik tanaffusdan so‘ng Yaponiya ning uchinchi divizionida ishtirok etuvchi “Fukusima Yunayted” jamoasi tarkibida o‘zining navbatdagi golini urdi.

Hujumchi faoliyatidagi 42-mavsumni o‘tkazayotganiga qaramay, Imperator kubogi doirasidagi uchrashuvda “Ivaki Furukava” darvozasiga beshinchi golni kiritdi. O‘yin 7:0 hisobida “Fukusima” foydasiga yakunlandi.

“Meni maydonga tushirgan murabbiy va barcha ishonch bildirgan insonlarning umidini oqlashni istadim”, — dedi Miura klub sayti orqali. — “Eng muhimi, biz katta hisobda oldinda borayotgan bo‘lsak-da, gol urgan paytimda futbolchilar, shtab a’zolari va muxlislar birgalikda shunday quvonch bilan bayram qilganini ko‘rib, beqiyos baxtni his qildim”.

Yaponiya da “Qirol Kazu” nomi bilan tanilgan Miura oxirgi marta 2022 yil noyabrida “Atletiko Suzuka” safida “FK Osaka” darvozasiga gol urgan edi. Yangi gol esa 25 iyul kuni qayd etildi va u 34 o‘yin davom etgan golsiz seriyaga chek qo‘ydi.

Miura 1990–2000 yillar orasida Yaponiya terma jamoasi uchun 89 ta o‘yin o‘tkazib, 55 ta gol muallifi bo‘ldi. 26 iyunda “Fukusima” klubi u bilan shartnoma 2027 yil iyuniga qadar uzaytirilganini e’lon qildi, demak, afsonaviy hujumchi faoliyatini yana bir necha yil davom ettiradi.

Miura “Fukusima” safida “Yokogama FK” klubidan ijara asosida o‘ynamoqda. U “Yokogama”ga 2005 yilda, 38 yoshida qo‘shilgan. Jamoa tarkibida 298 ta o‘yinda maydonga tushib, 27 ta gol urgan, ammo 2020 yildan buyon J2 ligasidagi ushbu klub uchun maydonga tushmagan.

1967 yil fevralda tug‘ilgan Miura 15 yoshidayoq professional futbolchi bo‘lish orzusi bilan Yaponiya ni tark etgan. U Braziliyaning “Juvеntus da Mooka” klubi akademiyasiga qo‘shilgan. Keyinchalik Braziliyada “Santos”, “Palmeiras” va “Koritiba” jamoalari safida professional tarzda to‘p surdi. 1990 yilda Yaponiya ga qaytib, sakkiz yil davomida “Verdi Kawasaki” klubida o‘ynadi. 1993 yilda J1 ligasi tashkil etilganidan so‘ng, u ketma-ket chempionliklarni qo‘lga kiritgan jamoaning yetakchi yuziga aylandi.

1994 yilda Miura “Jenoa” klubiga ijara asosida o‘tib, Italiya A seriyasida o‘ynagan ilk sharqiy osiyolik futbolchiga aylandi. Bir yil o‘tib, u yana “Verdi”ga qaytib, bu yerda jami 113 ta gol urdi.

Shundan so‘ng u Evropada Xorvatiyaning “Dinamo Zagreb” jamoasi safida qisqa va golsiz davrni o‘tkazdi. Keyingi olti yilda J1 ligasidagi “Kioto Pörpl Sanga” va “Vissel Kobe” klublari uchun o‘ynab, 53 ta gol muallifi bo‘ldi va shundan so‘ng “Yokogama”ga yo‘l oldi.

Miura 2017 yilda 50 yosh va 7 kunlik paytida dunyodagi eng keksa professional futbolchi sifatida rekord o‘rnatgan. U shunday qilib 1965 yildan beri saqlanib kelayotgan  Angliya terma jamoasi sobiq a’zosi Stenli Metyuzning natijasini ikki kunga yangiladi.