"Hamma bizdan qo‘rqadi, birinchisida penalti bor edi, ikkinchisida esa..." - Dragan Cheran

Sovrinlar yutishini ko‘rishga odatlanib qolganimiz -“Paxtakor” bu mavsumda bitta sovrindan ayrildi. O‘zbekiston Kubogi chorak finalida Namanganda “Navbahor”ga mag‘lubiyatga uchrab musobaqani tark etdi. Tabiiyki, “Sherlar” endi bor e’tiborini chempionatga qaratishadi.

Maksim Shatskix bosh murabbiy bo‘lib kelgach, hozircha o‘zi istagan o‘yinni yo‘lga qo‘ya olganicha yo‘q. “Navbahor”ga qarshi ketma-ket ikkita o‘ynagan “Paxtakor” turlicha taassurot qoldirdi.

Masalan, chempionat doirasida 1:1 hisobi bilan yakunlangan uchrashuvda ular yaxshiroq taassurot qoldirishgandi. Kubokda esa “Navbahor”da golli imkoniyatlar ko‘proq bo‘ldi. “Paxtakor” boshqalarda kuchsizlangandek taassurot ham uyg‘otyapti.

Shu sababli Cheran bilan aloqaga chiqdik. Suhbatni esa avval Kaxi Maxaradze bilan bog‘liq savol bilan boshladik, lekin Dragan bundan o‘zini olib qochdi.

- Dragan, “Lokomotiv” sardori Kaxi Maxaradze bilan bog‘liq vaziyat bo‘yicha nima degan bo‘lardingiz?

- “No comment”.

- Nega? Biror munosabat bildira olmaysizmi?

- Men bu haqida hech nima deya olmayman.

- Tushunarli. U holda ayting-chi, “Paxtakor”ning “Navbahor”ga mag‘lub bo‘lgan o‘yini xususida fikringiz qanday?

- Biz bu uchrashuvda o‘zimizning xatolarimiz evaziga mag‘lubiyatga uchradik. Albatta, vaziyat bunday tus olganidan juda afsusdamiz. Endi barcha e’tiborimizni chempionatga qaratamiz. Chempionlikni himoya qilish uchun qo‘limizdan kelgan barcha imkoniyatni ishga solamiz.

- O‘sha o‘yin mobaynida siz “Navbahor” sardori Azim Ahmedov bilan tortishib ketdingiz. Bunday bo‘lishiga nima sabab bo‘lgandi?

- Buning barchasi futbol. U meni qanday haqorat qilganini aytmayman. Futbol – bu ehtiros va barchasi shunday nihoyasiga etishi kerak. Men uni maydonda ko‘rmadim. Faqatgina uchrashuv so‘nggida baraban urayotganini ko‘rdim.

- Shuningdek, “Paxtakor” darvozasiga belgilangan ikkita penaltiga munosabatingizni ham bilmoqchiman...

- Hakam borasida biror izohim yo‘q. Faqat shuni aytishim mumkinki, birinchisida penalti bor edi. Ikkinchisida esa vaziyatni yaxshilab ko‘rish uchun sifatli kameralar yo‘q edi.

- Nima deb o‘ylaysiz, “Paxtakor” futbolchilariga Maksim Shatskixning uslubiga moslashish qiyinchilik tug‘diryaptimi?

- Har bir o‘zgarish qiyin. O‘yinchilar talablarga moslashishlari kerak.

- “Paxtakor”ni O‘zbekiston Kubogi finallarida ko‘rishga odatlanib qolgandik. Bu musobaqani ertaroq tark etgani klub qora chiziqdaligini bildiradimi?

- Ha, men finallarda o‘ynashga o‘rganib qolganman. Men 5 ta finalda o‘ynaganman. Mayli, hech qisi yo‘q. Bu – futbol.

- Namangandagi mag‘lubiyatdan keyin jamoaning kayfiyati qanday?

- Keyingi o‘yinga, yangi g‘alabalar uchun oldinga harakatlanishga tayyormiz.

- Yuqorida o‘zingiz ham aytganingizdek, “Paxtakor” bor e’tiborini chempionatga qaratishi aniq. Ammo bu erda ham oson emas. Chempionlik uchun imkoniyat haqida gap ketganda nima degan bo‘lardingiz?

- Hamma bizdan qo‘rqadi. Chunki barcha bizda eng yaxshi va sifatli jamoa borligini biladi. Hech kim bizga hech nima qila olmaydi.