Italiyalik fanatlar Shomurodov haqida nima deyapti?
Evropa futbolida jamoalarning ashaddiy muxlislarining fikr-mulohazalari klublar rahbariyati tomonidan inobatga olinishiga ko‘p bor guvoh bo‘lganmiz. Klub, jamoa, murabbiy, futbolchilarga doir hech qaysi yangilik, voqea va o‘zgarishlar fanatlarning e’tiboridan chetda qolmaydi.
Xususan, o‘zbekistonlik hujumchi Eldor Shomurodov ko‘chib o‘tgan “Jenoa” futbol klubining ham o‘ziga yarasha sodiq ixlosmandlari bor va ular jamoa taqdiriga befarq emas.
Xorij ommaviy axborot vositalari “Jenoa” muxlislarining Eldor Shomurodov bo‘yicha bildirgan fikrlariga jamlab, ularni e’lon qilmoqda. Aytish joizki, ayrim muxlislar o‘zbekistonlik legionerga katta umid bildirayotgan bo‘lsa, ba’zilari transferlar mavsumida yulduz darajasidagi hujumchini kutganini yashirmayapti.
Demak, “Jenoa” muxlislarining Eldor Shomurodov transferi bo‘yicha fikrlari bilan tanishamiz.
Ivan Quartulli:
O‘tgan mavsumda Eldor juda zo‘r o‘ynadi va eng yaxshi to‘purarlardan biri bo‘ldi. Yangi mavsumda esa, chempionatda gol urolmadi. Birdan genuyaliklar paydo bo‘ldi va hujumchi uchun biri necha milliondan voz kechdi. Jamoamiz tarkibida u o‘tgan yilgi darajasiga ko‘tarilib olishiga umid qilamiz!
Mirko Melis:
Vaziyatdan kelib chiqib, Pandev o‘ziga munosib o‘rinbosar topilgunicha 50 yoshgacha o‘ynaydigan ko‘rinadi.
Ar Nicco:
Keyingi yillarda bir necha hujumchilarni sotib oldik, lekin ulardan hech biri zo‘r to‘purar bo‘lib chiqmadi. Shomurodov kuchsiz bo‘lgan Rossiya chempionatidan keldi. U gol urolmayotgan edi. Biz katta pul sarfladik. Dunyoning turli burchaklaridan o‘yinchi olgandan ko‘ra, bitta zo‘r hujumchi taklif qilish kerak edi.
Nicola Aschero:
Ishonchimizni oqla, yigit. Bizga sening gollaring kerak!
Rosell Guarnieri:
Men oxirigacha bu mish-mish, deb o‘yladim. Yo‘q, uni futbolkamizda ko‘rdim. Rossiyada gol urolmayotgan hujumchi uchun 9 million to‘lash bu faqat bizga xos. “Atalanta” Rossiyadan Miranchuk singari ajoyib futbolchini 15 million evroga xarid qildi.
Gian Marco:
Yana bir tushunarsiz xarid. Hujumchi mavsumda bitta gol uribdi. Yaqinda u “Jenoa”da bir necha o‘yinda maydonga tushadi, o‘zini ko‘rsatolmasa, zaxiraga mixlanadi. Kunimiz yana nevara kutayotgan Pandevga qoladi.
Bruno Emmanuele:
Rossiya ligasidan kelgan o‘yinchilar har doim ham A Seriyaga moslasha olmaydi. Lekin jamoamiz pandemiya inqirozi davrida turli manbalarga murojaat qilishga majbur. Miranchuk, Shomurodov va bu yana davom etadi.
Marco Sparso:
Salbiy fikrlar uchrayapti. Kelinglar, Eldorga imkoniyat beraylik! Men uning o‘yinlaridan lavhalar tomosha qildim. U zo‘r. Tezkor, bosh bilan yaxshi o‘ynaydi, zarbasi bor va pas berishni biladi. Kelinglar, uni amalda nimalarga qodirligini ko‘raylik!
Ko‘rinib turibdiki, Eldor Shomurodov transferi bo‘yicha fikrlar har xil. Lekin bularning bariga javob bitta. Eldor “Jenoa” tarkibidagi o‘yini va gollari bilan o‘zining qanday hujumchi ekanini ko‘rsatib qo‘yishi kerak...
Fikrlar