Legionerimiz Parijda chempion bo‘lmoqchi!
Umarali Rahmonaliev o‘zbek futboli maktabining eng iqtidorli tarbiyalanuvchilaridan hisoblanadi.
20 yoshli yarim himoyachi 2023 yilning yanvar oyidan Rossiya Premer-ligasi vakili “Rubin” a’zosi hisoblanadi.
Legionerimiz Premer-liganing 29-turida “Spartak”ga qarshi o‘tkazilgan uchrashuvni boshlang‘ich tarkibda boshladi. Moskvaliklarning 3:1 hisobidagi g‘alabasi bilan yakunlangan bahssdan keyin Umarali Rahmonaliev metaratings.ru sayti jurnalisti savollariga javob qaytardi.
Sports.uz portali ushbu suhbatni o‘zbekistonlik futbol ishqibozlari e’tiboriga havola etadi.
— Bizga yaratilgan vaziyatlardan unumli foydalana olish qobiliyati etishmadi, himoyada yaxshi o‘ynadik, lekin shunga qaramay, raqibning uchala goliga ham o‘zimiz sababchimiz, “Spartak” favqulodda hech narsa yarata olgani yo‘q, - deb o‘ylayman.
— Bosh murabbiy Rashid Rahimov klubni tark etishi mumkinligi haqida xabar tarqaldi. Bu sizlarga bosim o‘tkazmadimi?
— Biz bu haqida hech narsa bilmaymiz, bor e’tiborimizni 30-turda “Sochi”ga qarshi bo‘ladigan uchrashuvga qaratganmiz. Shaxsan men uchun Rahimov bilan ishlash qulay.
— Klub bilan Olimpiadaga borishingiz haqida gaplashib oldingizmi?
— Hozircha yo‘q. Klub bilan hali gaplashib olamiz. Terma jamoada o‘ynar ekansiz, bu har doim qandaydir tajriba bo‘ladi.
— Futboldagi orzungiz qanday?
— Klub bilan imkon qadar yuqoriga ko‘tarilish. Terma jamoadagi orzum esa, Parijdagi Olimpiya o‘yinlarida g‘olib chiqish.
— Buning imkoni bormi?
— Albatta!
Umarali Rahmonalievning “Rubin” bilan shartnomasi 2026 yilning 30 iyuniga qadar davom etadi. 20 yoshli yarim himoyachi joriy mavsumda klub miqyosida barcha turnirlarda 16 marotaba maydonga tushdi. Transfermarkt portali legionerimizni 600 ming evroga baholamoqda.
Fikrlar