Mbappe korrupsiya ishi bo‘yicha politsiyada so‘roq qilindi

Madridning «Real» klubi va Frantsiya terma jamoasi hujumchisi Kilian Mbappe hamda uning onasi Fayza Lamari Frantsiya milliy jamoasi xavfsizlik xizmati sobiq rahbari Muhammad Sanhadjiga nisbatan olib borilayotgan tergov doirasida ko‘rsatma berdi. Bu haqida L’Équipe  nashri xabar berdi.

Nashr ma’lumotiga ko‘ra, futbolchi 30 sentabr kuni Frantsiya Milliy politsiyasi Bosh inspektsiyasida so‘roq qilingan. Uning onasi esa 9 oktabr kuni Parijda uch nafar tergov sudyasining savollariga javob bergan.

Tergov Sanhadji tomonidan ehtimoliy korrupsiya va ta’sir doirasidan foydalanish holatlariga taalluqli. Tergovchilar uning futbolchilardan pul va sovg‘alar olgani, shuningdek, xususiy qo‘riqlash xizmatlari ko‘rsatilishi bilan bog‘liq holatlarni o‘rganmoqda. Jumladan, Sanhadjining Mbappening 2023 yilda Kamerunga qilgan safaridagi ishtiroki ham tekshirilmoqda.

So‘roqdan so‘ng Lamariga «yordamchi guvoh» (témoin assisté) maqomi berildi. Tergov sudyalari uni rasmiy ayblash uchun mavjud asoslar yetarli emas, degan xulosaga kelgan.

Avvalroq Mbappe Qatarda bo‘lib o‘tgan 2022 yildagi Jahon chempionati uchun olgan mukofot pulidan 60 300 evroni Sanhadjiga o‘tkazib bergani haqida xabar qilingan edi.