Rasman! "Barselona"dan haydalgan Kuman faoliyatini qaerda davom ettirishi aniq bo‘ldi

Ronald Kuman tez orada Niderlandiya terma jamoasi bosh murabbiyi lavozimiga qaytadi.

Niderlandiya Qirollik futbol assotsiatsiyasining ma’lum qilishicha, “Barselona”ning sobiq bosh murabbiyi joriy yil Qatarda bo‘lib o‘tadigan jahon chempionati yakunlanganidan so‘ng, aniqrog‘i, 2023 yilning 1 yanvaridan boshlab o‘z faoliyatini boshlaydi. Kuman bu borada Lui van Galning o‘rnini egallaydi.

Mutaxassisning Niderlandiya Qirollik futbol assotsiatsiyasi bilan shartnomasi 2026 yilgacha mo‘ljallangan.

Eslatib o‘tamiz, Kuman 2018-2020 yillarda Niderlandiya terma jamoasini boshqargan va shundan so‘ng "Barselona"ga ketgan. U 2021 yilning noyabrida Kataloniya klubidan iste’foga chiqarilgan.