Rasman "Mash’al"da bosh murabbiy o‘zgardi. Aliqulovning qaerda ishlashi ham ma’lum

Rasman "Mash’al" klubida bosh murabbiy o‘zgardi. Klub matbuot xizmatining yozishicha, ikkinchi davra arafasida murabbiylar shtabi yangilandi. Jamoa bosh murabbiyi sifatida Otabek Narzullaev tayinlandi.

Bungacha jamoaning bosh murabbiyi vazifasida faoliyat yuritib kelgan Asror Aliqulov klubning U21 jamoasiga rahbarlik qiladigan bo‘ldi. Mazkur qaror klubning ichki tizimidagi ish samaradorligini oshirish, yoshlar va asosiy tarkib o‘rtasida uzviy bog‘liqlik yaratish maqsadida qabul qilindi.

Otabek Narzullaev futbolimizda yaxshi tanish shaxs hisoblanadi. Uning futbolga bo‘lgan yondashuvi, jamoa qurishdagi zamonaviy uslubi va intizomga tayangan mashg‘ulotlari futbol muxlislariga yaxshi ma’lum. U avval ham «Mash’al»ning turli yosh toifasidagi jamoalari bilan samarali ish olib borgan, kuchli murabbiylardan biri sifatida e’tirof etilgan.

Jamoa bugungi kunda yangi mavsum uchun tayyorgarlik ishlarini jadal olib bormoqda. Otabek Narzullaev boshchiligida mashg‘ulotlar yanada yuqori intizom va professional darajada tashkil etilmoqda. Maqsad — yangi mavsumda klubning maqomi va natijalarini yaxshilash, muxlislar ishonchiga munosib jamoa ko‘rinishini ta’minlash.

«Mash’al» rahbariyati, murabbiylar va futbolchilar yangi mavsumda muxlislar ishonchini oqlashga, yuqori maqsadlar sari intilishga bel bog‘lagan", - deyiladi rasmiy xabarda.