Ravshan Ermatov hakamlar masalasiga tanqidiy yondashyapti yoxud sohaga doir yangiliklar bor

Bugun O‘zbekiston futbol assotsiatsiyasida Coca-Cola Superliga hakamlari uchun seminar bo‘lib o‘tmoqda. Bu xususida O‘zbekiston futbol hakamlari markazi rasmiy telegram kanali xabar bermoqda. Seminarni O‘FA vitse-prezidenti Ravshan Ermatov ochib berdi va o‘z nutqi davomida mamlakatimizda hakamlik darajasi sezilarli pasaygani jamoatchilik tomonidan ham qayd etilayotganini aytib, masalaga tanqidiy yondashish lozimligiga urg‘u berdi.

Seminar davomida FIFA o‘yin qoidalariga oid yangiliklar e’lon qilindi. Shuningdek, tajribali ekspertlar tomonidan tayyorlangan videoroliklar yordamida hakamlarning so‘nggi vaqtlardagi xatti-harakatlari tahlil qilindi.

Bundan tashqari, O‘zbekiston futbol hakamlari markazi direktori Laziz Qo‘chqorov so‘zga chiqib, markaz ochilganidan buyon hakamlikni rivojlantirishga qaratilgan qator ishlar amalga oshirilgani, biroq shunga qaramay futbol jamoatchiligida hakamlarga ishonchsizlik bilan qaralayotganiga e’tibor qaratdi.

Seminar davomida e’tiborga molik yangiliklardan Aziz Asimov FIFAdagi o‘rnini Rahimbek Karimovga bo‘shatib bergani bo‘ldi. Bu o‘z navbatida yosh hakamlarga bo‘lgan ishonch bo‘lib ixtiyoriy tarzda amalga oshirilgani alohida ta’kidlandi. Shuningdek, Coca-Cola Superliga yordamchi hakamlarining gonorari oshirilgani seminar ishtirokchilari tomonidan iliq kutib olindi. Istiqbolda Pro liga yordamchi hakamlari va nazoratchilarning ham gonorarlari oshirilishi ma’lum qilindi.

Kunning ikkinchi qismida esa VAR bo‘yicha zaruriy uslubiy tavsiyalar berildi. Seminarda Vladislav Tseytlin, Valentin Kovalenko va Bobur Haydarov kabi tajribali mutaxassislar ishtirok etishdi.