“Real” Mbappega qaram bo‘lib qolgani xavotirga solmoqda

Madridning “Real” klubi sobiq futbolchisi Xorxe Valdanoning fikricha, joriy mavsumda jamoa Kilian Mbappega keragidan ortiq darajada bog‘lanib qolgan.

26 yoshli frantsiyalik hujumchi yakshanba kuni La Liga doirasida “Jirona”ga qarshi 1:1 hisobidagi durang bilan yakunlangan o‘yinda madridliklarni mag‘lubiyatdan qutqarib qoldi.

Mbappe raqib darvozasiga penaltidan gol urib, Ispaniya chempionati to‘purarlari poygasidagi etakchiligini mustahkamladi.

- “Real”ga shu savolni berishlari kerak: “Mbappesiz jamoa hozir qaerda bo‘lardi?”, - deydi Valdano Madrid Universal jurnalistlariga bergan intervvyusida.

Kilian Mbappe Xabi Alonso jamoasida muntazam to‘p kiritayotgan yagona o‘yinchi hisoblanadi. U joriy mavsumda barcha turnirlardagi 19 o‘yinida 23 ta gol va 3 ta samarali uzatma muallifi bo‘ldi.