"Roland Garros". Azarenko sensatsion tarzda mag‘lub bo‘ldi, Uilyamsga texnik mag‘lubiyat yozildi

"Roland Garros" turnirining ayollar o‘rtasidagi bellashuvlarida ham kuchlilar nomi tobora aniqlashib bormoqda. Asosiy bahslarning navbatdagi kunida kutilgan natijalar qatori ba’zi sensatsiyalar ham bo‘y ko‘rsatdi.

Dastlab, o‘z o‘yinini o‘tkazgan 1-raqamli raketka sohibasi Simona Xalep hamyurti Irina-Kameliya Beguga qarshi bahs olib bordi. Raqibasidan har taraflama ustunlik namoyish etgan Simona bellashuvni 6:3, 6:4 hisoblarida o‘z foydasiga hal qildi. Aytish mumkinki, Xalep navbatdagi titul sari dadil odimlamoqda.

Yana bir saralangan raketka ustasi Kike Bertens o‘zidan-da tajribali raqibasi italiyalik Sara Erranini mag‘lub etishni uddaladi. Har ikki tennischi uchun og‘ir o‘tgan bahs taqdiri 3-set tay-brekda hal bo‘ldi va unda Bertens keyingi bosqich chiptalarini ilib ketdi. Yakuniy hisob: 7:6, 3:6, 9:7.

Bu galgi "Katta dubulg‘a" turnirining 3-raqamli raketka ustasi, Ukraina sharafini himoya qiluvchi Elina Svitolina ham 3-bosqichga o‘tish uchun biroz ter to‘kishiga to‘g‘ri keldi. Meksikalik raqibasi Renata Sarasua bilan kechgan qizg‘in bahsda g‘alabani o‘z nomiga yozdirib qo‘ygan Elina 6:3, 0:6, 6:2 hisoblarini qayd etdi.

Yuqoridagi tennis malikalaridan farqli o‘laroq, belaruslik Viktoriya Azarenko slovakiyalik Anna Shmidlova qarshiligini sindira olmadi. Butun uchrashuv davomida o‘ziga o‘xshamagan Azarenko yakunda ikkala setni ham bir xil 6:2 hisobida boy berib, raketkalarini g‘ilofiga joylashga majbur bo‘ldi. Aynan uning turnirni tark etishi kun sensatsiyasiga aylandi.

Shuningdek, bugun tennisga befarq bo‘lmagan barcha uchun biroz noxush xabar tarqaldi: dunyoning sobiq birinchi raqamli tennischisi, "Roland Garros-2020"da 6-tartib raqami ostida saralangan Serena Uilyams oyog‘idan olgan jarohati tufayli musobaqani davom ettira olmasligini ma’lum qildi. Natijada, 2-bosqichdagi bolgariyalik Tsvetana Pironkovaga qarshi bahs uchun okean orti vakilasiga texnik mag‘lubiyat yozildi.