Shahboz Erkinov: "Murtazoev sovuganidan keyin nimalar qilib qo‘yganini tushunib etgandir"

“Andijon” klubi O‘zbekiston Soca-Cola Kubok 1\8 final bosqichida “Turon”ni qabul qilib, 3:2 hisobida g‘alaba qozondi va chorak finalga chiqdi.

Ushbu uchrashuv qahramonlaridan biri Shahboz Erkinov bo‘ldi. “Burgutlar” hujumchisi birin-ketin ikkita gol urib, jamoasining g‘alabasiga katta hissa qo‘shdi. Shu bois tajribali hujumchiga bir qator savollar bilan murojaat qildik.

- Avvalo, jamoani muhim o‘yindagi g‘alaba bilan tabriklayman. Bunday qaynoq derbidan qanday taassurotlar qoldi?

- Taasurotlar ham ijobiy, ham salbiy. Yaxshisi, adrenalin katta bo‘ldi. Ayniqsa, birinchi taymni o‘zida 3 ta gol urganimiz ancha ishonch bag‘ishladi. O‘yinni boshqacha boshladik. O‘tgan o‘yinni tahlil qilganimizda Viktor Kumikov bizga tushuntirib berdiki, 90 daqiqaning 60 daqiqasida agressiv o‘ynagan ekanmiz. Videolavhalar orqali bizga tushuntirib berdi. 30 daqiqasida ko‘ngildagidek o‘ynamaganimiz evaziga tashabbus “Turon”ga o‘tgan. Yana shu narsa takronlanmasligi uchun uchrashuv boshidan tajovuzkor o‘yin ko‘rsatishga harakat qildik va bu foyda berdi. Negativ tarafi ikkinchi taymda bo‘ldi. Baribir xohlaysizmi-yo‘qmi, yana biroz bo‘shashdik, himoyaga qaytdik. 3:0 dan keyin o‘sha muvozanatni saqlab qola olmadik. Bu narsa pand berdi. Humoyun Murtazoevni qilgan ishi o‘yin haqida yomon asorat qoldirdi.

- Uning xatti-harakatiga sizda qanday reaktsiya paydo bo‘ldi? Har holda o‘sha vaziyat juda “provakatsiya” edi...

- Uni bunday yo‘l tutishga bizning futbolchimiz Goron Miloykoni o‘tgan safar shunga o‘xshash harakat qilgani sabab bo‘ldi, deb aytishdi. Ishonasizmi, buni biz ko‘rmaganmiz, hech kimni xabari yo‘q edi. O‘yindan oldin rahbariyat oldimizga kirib, o‘tgan safar shunaqa ish bo‘lgan ekan, deb aytishdi. Miloykoni ularga nisbatan ichi qoraligi yoki g‘alamaslik niyati bo‘lganida bu haqida bizga aytgan bo‘lardi. O‘sha uchrashuvdan keyin deyarli 10 kun vaqt o‘tdi. Bu haqida umuman gap-so‘z bo‘lgani yo‘q. Faqat kechagi bahsdan avval ularni rahbariyati shunaqa ish bo‘lgandi, deya bizni rahbariyatga aytibdi. Natijada uchrashuvdan oldin bu xususida rahbariyatimiz bizga e’tiroz bildirib, bunday qilmaslikni aytib, hurmatni saqlash muhimligini uqtirdi. Keyin bu xususida Gorondan nima bo‘ldi, deb so‘rasak hammasi xissiyotda bo‘ldi, nimaga bunday bo‘lganini bilmayman dedi. O‘zi ko‘rgan bo‘lsangiz, u shunaqa hissiyotli bola. Boshqa o‘yinlarda ham gol urganimizda muxlislarimiz oldiga borib qandaydir qiliqlar qiladi, allambalo harakatlari bor. Lekin Goron ularga nisbatan ataylab bir nima qilgani yo‘q. Xullas, unga barchamiz tushuntirdik. Ammo o‘zimizni o‘zbek musulmonlar shunaqa ish qilgani hayron qoldirdi. To‘g‘ri, balki qaytarmoqchi bo‘lgandir. Humoyunni yaxshi bilaman, u qiliq qiladigan bola emasdi. Balki sovugandan keyin nimalar qilib qo‘yganini tushunib etgandir. O‘yin paytida men ko‘rmadim. Kechki payt videoda ko‘rib, ko‘pchilik do‘stlarim ham mendan so‘rashdi, bu nima qiliq deb?! Keyin videoda uning qilig‘ini ko‘rib, jaxlim chiqib ketdi. Qattiq ta’sir qiladi. Yaxshihamki, o‘yin paytida uning harakatini ko‘rmagan ekanman, aks holda biz ham unga nisbatan qizishib ketishimiz mumkin edi va bu oxiri yaxshilik bilan tugamaydigan ishga aylanib ketishi hech gap emasdi. “Bunyodkor”da ham, “Mash’al”da ham birga o‘ynaganmiz. Murtazoevning ishi qattiq hayron qoldirdi. Bu vodiy derbisi, xalqqa qarab bunday ish qilishi madaniyatimizga ham to‘g‘ri kelmaydi. Menimcha, o‘zi tushunib etgandir.  

- O‘yinni burilish nuqtasi – bu sizning birin-ketin urgan ikkita golingiz bo‘ldi. Shunday boshlashingizni kutganmidingiz?

- Hamma o‘yinda tezroq gol urishga harakat qilamiz. Ayniqsa, uyda o‘ynayotganda hamma jamoa 10-15 daqiqada gol urishni istaydi. Biz bunday muxlislar qarshisida o‘yin boshida gollar urib olganimiz ajoyib bo‘ldi. Bu narsa har doim ham o‘xshayvermaydi. Biroq kecha o‘xshadi.

- Birinchi taymdagi 3:0 jamoani bo‘shashtirdimi? Tanaffus paytida bosh murabbiy qanday ko‘rsatma bergandi?

- Bo‘shashmasligimiz haqida alohida uqtirgandi. Hozir ular maydonga chiqib, tezroq yuguradi, tarkibida o‘zgarishlar qiladi, raqibni yo‘qotadigan narsasi qolmadi, shu bois muvozanatni yo‘qotmasligimiz haqida bizni qattiq ogohlantirdi. Orqaga yotib olmasligimizni rosa uqtirdi. Ammo maydonga chiqib, murabbiyimizni barcha aytgan ko‘rsatmalarini to‘liq bajara olmadik, hammasi aksincha tus oldi. Oqibatda darvozamizdan 2 ta gol o‘tkazib yubordik va oxiri biroz xavotirli o‘tdi.

- Asosiy raqobatchiga qarshi ketma-ket ikki marta maydonga tushish qanchalik og‘ir?

- Faqat raqobatchiligi uchun emas, balki har qanday jamoa bilan u autsayder bo‘lsa ham bir jamoa bilan birin-ketin ikki marta o‘ynash qiyin. Ayniqsa, bir raqibni ikki marta mag‘lub etish og‘ir. “Turon” esa to‘g‘ridan-to‘g‘ri raqobatchimiz. Bu derbi edi va muxlislar o‘rtasida ham raqobat bor. Albatta, oson bo‘lgani yo‘q. Xudoga shukrki, yuzimiz yorug‘ bo‘ldi.

- Ahamiyatlisi, “Andijon” ushbu chempionatda “Turon” bilan uch marta o‘ynadi va uchchalasida ham yutdi. Bu nimadan dalolat? O‘sha o‘yinlarni bir-biridan farqli tomonlari nimada bo‘ldi?

- Hammasi qiyin. “Turon” munosib raqobatchi. Pro ligada bu jamoani asosiy raqobatchi deb hisoblayman. O‘tkazgan hech bir o‘yinimizni ajratib ko‘rsatmayman. “Turon”da hurmatga loyiq o‘yinchilar bor. Jamoa ham yaxshi futbol ko‘rsatadi. Ular bilan o‘ynash oson emas. Shukurki, barchasida yutdik.

- “Andijon” chorak finalga chiqdi. Aksar klublar Kubok bahsiga katta e’tibor qaratmaydi. Jamoaning bu boradagi real maqsadi qanday?

- Bu bosqichdan boshlab Superliga klublari ham ikkinchi darajali sifatida qarashmaydi. Balki shu bosqichgacha jamoalar unchalik jiddiy e’tibor qilishmagandir va aralash tarkib tushirgandir. Lekin chorak finaldan barcha yanada jiddiy e’tibor qiladi. Biz ham harakat qilamiz. Ko‘p narsa qur’aga bog‘liq.

- Qur’adan qanday raqibni kutyapsiz? To‘g‘ri, kuchsiz raqib qolmagan. Shunday bo‘lsa ham ayting-chi, “Andijon”ga kim qulayroq?

- Mening taxminimcha bizga grand klub tushsa kerak. Bu bizga yangi chaqiruv bo‘ladi. Oxirigacha kurashamiz.

- Bu mavsumda to‘purarlik salohiyatingizni oshiryapsiz. Chempionatda 7 ta golingiz bor, Kubokda ham gol urishni kanda qilmayapsiz. Golga chanqoqligingizni isbotlayapsiz. Sizda yangicha ishtiyoq paydo bo‘ldimi?

- Futbol o‘ynagim kelyapti. Kuchim bor. Futbolga mehr bor, shuning uchun hali so‘ngani yo‘q. Harakat qilyapman. Jamoamiz yordami bilan gollar urilyapti. Bundan buyog‘iga ham yana gollar urishga harakat qilamiz.

- Jamoa yaxshi o‘ynayapti, faqat uchrashuv oxirlarida biroz bo‘shashib qolyapti. Natijada ayrim vaziyatlarda o‘ziga-o‘zi muammo tug‘diryapti. Bu ruhiyat bilan bog‘liqmi?

- Faqat “Turon” bilan ikkita o‘yinni hisobga olib aytsak bo‘ladi. Hisobda oldinda edik. Ular chempionatda lider edi. Endi biz 1-o‘rindamiz. “Turon” bilan bahslarda ko‘proq natijani ushlab qolish uchun o‘ynaldi. Qolgan uchrashuvlarda unday emas. Qaytanga, jismonan kuchli bo‘lganimiz uchun raqib jamoalarni “bosardik”. 75 dan 90-daqiqagacha gol urardik. Aminmanki, agar “Turon” bilan o‘yinlarda durang yoki yutqazayotgan bo‘lganimizda hech qachon bunaqa bo‘lmasdi. O‘yinga kuch qo‘shsak qo‘shardikki, aslo o‘yinni tashlab yubormasdik. Hammasi ruhiyat bilan bog‘liq. “Turon” bizga munosib raqib. Muxlislar bizni qo‘llab-quvvatlab turishsa, bu bizga katta dalda beradi.