"Yaxshi jamoa va tarkibida shunga monand futbolchilar bor, u a’lo darajadagi hujumchi" - Dragan Cheran "Andijon" va Xebayga yuqori baho berdi

“Paxtakor” klubi chempionlik kamarini munosib himoya qilish uchun astoydil kurashayotganini bilasiz. 13-turda ular “Bunyodkor” maydonida muhim o‘yinni o‘tkazishdi. Qiyin kechgan bellashuvda “Paxtakor” klubi 90+4-daqiqada kiritilgan ikkinchi gol evaziga o‘ta muhim g‘alabani qo‘lga kiritgan holda uch ochkoni naqd qilib qo‘ydi.

Uchrashuv 1:1 natijasi bilan yakunlanishi katta ehtimol bo‘lib turgan bir vaziyatda “paxtakor”chilar so‘nggi soniyalarda gol urib g‘alabani ilib ketishdi. “Paxtakor” sardori va etakchisi Dragan Cheran garchi gol urmaganiga qaramasdan g‘alabaga doimgidek munosib hissasini qo‘shdi. U avvaliga “Bunyodkor”ga qarshi bellashuv borasida fikrlari bilan o‘rtoqlashdi.

“Tanaffusdan keyingi ilk o‘yin doim qiyin kechadi va biz buni bilardik. Jamoadagilar anchagacha birga bo‘lishmadi. Bu hol esa o‘z navbatida o‘yinimizga ta’sir o‘tkazmasdan qolmadi. Qisqasi, faqat uchrashuvning ikkinchi bo‘limiga kelib o‘z xarakterimizni namoyish eta oldik va g‘alabani qo‘lga kiritdik”.

Uchrashuvni ko‘rgan bo‘lsangiz, “Paxtakor” uchun oson kechgani yo‘q. Aslida ham bunday derbilar qiyin bo‘lishi aniq edi. Dragandan “Paxtakor”ni ushbu uchrashuvda nima qiyinlashtirdi, deb so‘raganimizda javobi shunday bo‘ldi:

“To‘liq iyun oyini o‘yinlarsiz o‘tkazganimiz bois ritmdan chiqib qolgandik. O‘ylaymanki, bunday muammo ushbu turda barcha jamoalar sezildi. Umid qilamanki, bu muammo tez orada barham topadi”.

“Paxtakor” 29 iyun kuni chempionatning 8-tur qoldirilgan turida o‘z maydonida “Andijon”ni qabul qiladi. Cheran esa bo‘lajak uchrashuv va raqib haqida ham to‘xtaldi.

“Yaxshi jamoa va uning tarkibida shunga monand futbolchilar bor. Ular esa zo‘r o‘yin ko‘rsata olishadi. Bunday ijrochilarga ega klub esa maqtovlarga munosibdir. Muxlislari ajoyib tarzda qo‘llab-quvvatlaydi".

Xabaringiz bor, “Andijon”ning albaniyalik hujumchisi Rubin Xebay Superliga doirasida 8 ta gol urdi va barcha ushbu legioner xususida iliq gaplarni gapiryapti. E’tiborlisi, Cheranning hisobida 9 ta gol bor va Superligada to‘purarlik ro‘yxatida peshqadamlik qilyapti. Xebayda esa 8 ta gol va Cheranni ta’qib etib kelyapti. Shu bois Dragandan Xebay to‘g‘risidagi fikri bilan ham qiziqib ko‘rdik.

“A’lo darajadagi hujumchi! U vaziyatlarni yaxshi his qiladi va o‘yin taqdirini hal eta oladigan ijrochidir. Biz yaxshi do‘stlarmiz va o‘rtamizda raqobat yo‘q, deb bemalol ayta olishim mumkin. Uni hurmat qilaman".

Shuningdek, “Paxtakor”dagi Abbos Fayzullaev ham alohida mavzuga aylanib qolayotganini bilib turibsiz. Osiyo chempioni va jahon chempionati ishtirokchisi hisoblangan Fayzullaev Evropada to‘p surishga tayyormi? Cheran yosh jamoadoshi haqida shunday dedi:

“U bizning istiqbolli, porloq o‘yinchimizdir va men uni o‘zbek futbolining kelajagi sifatida tasavvur qilaman. Yana shunga ishonamanki,  u faoliyatini Evropa futbolida davom ettira oladigan darajaga bemalol ko‘tarila oladi”, - deydi Dragan.

Shuhratbek Jo‘raev.