“Yuventus” Shomurodov uchun muhim imkoniyat!
O‘zbekistonning bugungi kundagi eng kuchli futbolchisi Eldor Shomurodov o‘yinida pasayish kuzatilmoqda. Yaqinda Toshkent shahrida tashkil etilgan milliy terma jamoamiz o‘quv-mashg‘ulot yig‘inida deyarli barcha etakchi futbolchilarimiz ishtirok etdi. Albatta, asosiy hujumchi Shomurodovga muxlisu mutaxassislar, jurnalistlar, tahlilchilarning e’tibori ko‘proq bo‘ldi.
Hujumchimiz anchadan beri Italiya chempionatida gol ura olmayotgan edi. Eldor oxirgi marotaba 20 fevral kuni “Verona” darvozasini ishg‘ol qilgan. Keyingi o‘yinlarda uning zarbalari raqib darvozasi to‘riga borib tushgani yo‘q. Hamyurtimizning golsiz seriyasini Italiya futbolining murakkabligi, kuchliligi, himoyasi mustahkamligi, “Jenoa”ning hujumkor bo‘lmagan jamoa ekaniga yo‘ydik.
Toshkentdagi yig‘in doirasida Gananing ikkinchi tarkibi va Iroq terma jamoalariga qarshi o‘tkazilgan o‘rtoqlik uchrashuvlarida ham bosh jamoamizning eng yorqin yulduzi golsiz seriyasini davom ettirdi. Bungacha, Shomurodov rasmiy va o‘rtoqlik uchrashuvlarida gol urib, muxlislarning ishonchini oqlab kelayotgan edi.
Albatta, Shomurodovni tanqid qilishdan yiroqmiz. Lekin hujumchining asosiy vazifasi gol urishdan iborat. Eldor gol urmasa, 2022 yili Qatarda bo‘ladigan jahon chempionatiga chiqa olmasligimiz ham tayin. Chunki, asosiy hujumchi sifatida saralash o‘yinlarining aksariyatida aynan Shomurodov o‘ynashi hozirdan hammaga ma’lum.
Terma jamoa yig‘inidan Italiyaga qaytgan Eldorning jamoasi A Seriyada “Fiorentina”ga qarshi o‘yin o‘tkazdi.
Legionerimiz “Jenoa”ning oxirgi o‘nta uchrashuvidan beshtasida boshlang‘ich tarkibda o‘ynagan bo‘lsa, yana shunchasida zaxiradan o‘yinga qo‘shildi. Lekin birorta uchrashuvni to‘liq o‘tkazgani yo‘q. Ayrim bahslarda tahlilchilar tomonidan eng past ball oldi. Ba’zan, eng yaxshi futbolchilardan biri sifatida e’tirof etildi. Ya’ni, Eldor barqarorlikka erisha olgani yo‘q.
Eldor A Seriyadagi debyut mavsumida 22 ta uchrashuvda uchta gol urib, bitta golli pas amalga oshirdi xolos. Shu o‘yinlarning 48 foizida boshlang‘ich tarkibda to‘p tepdi va butun o‘yin vaqtining 51 foizini maydonda o‘tkazdi.
Jamoa bosh murabbiyi Davide Ballardini keyingi paytda hujumda tajribali Goran Pandev, to‘purarga aylangan Mattia Destro va yosh Janluka Skamakkaga ko‘proq ishonch bildira boshladi. Xususan, “Fiorentina”ga qarshi bahsda ham Shomurodov 83-daqiqada maydonga tushib, atigi 11 daqiqa o‘ynadi. Bu vaqt ichida to‘pga uch marta tegdi, ikkita to‘p uzatishidan bittasi aniq, ikkinchisi noaniq chiqdi, o‘yinda o‘zining ustun tomonlari – tezlik va tempini namoyish eta olmadi.
Balki Eldorning boshlang‘ich tarkibga kiritilmagani va nursiz o‘yinini bir necha ming kilometrlik masofaga cho‘zilgan yo‘l azobi bilan oqlash mumkindir. Har holda Toshkent va Genuya o‘rtasidagi masofa oz emas.
Nima bo‘lgan taqdirda ham, o‘zbekistonlik futbol muxlislari, mutaxassislar, jurnalistlar Eldorga nisbatan ishonchni susaytirmaymiz. Uning o‘yinidan, xatti-harakatidan ijobiy jihatlarni qidiraveramiz. Shunday ekan, endi umidimiz A Seriyaning navbatdagi turida Turinda “Yuventus”ga qarshi o‘yindan.
Ko‘pchilikning diqqat-markazida bo‘ladigan bu bahsda Shomurodov boshlang‘ich tarkibga kiritaladimi yoki zaxiradan maydonga tushadimi, qancha o‘ynashidan qat’i nazar, o‘zini ko‘rsata olishiga umid bildiramiz. Har holda Turin superklubining qishda o‘zbek futbolchisiga qiziqish bildirgan bor gap va bu Eldorning o‘ziga ham qo‘shimcha ishtiyoq va motivatsiya bo‘lib xizmat qilishi kerak.
Ayni paytda esa Shomurodov jamoadoshlari bilan bu uchrashuvga puxta tayyorgarlik ko‘rmoqda. Bo‘lajak uchrashuv Eldorga yangi imkoniyat. Bundan foydalanishiga ishonib qolamiz.
A Seriyaning 30-turidan o‘rin olgan “Yuventus” - “Jenoa” bahsi Toshkent vaqti bilan 18:00 da boshlanadi.
Fikrlar