"Эл Класико"да икки буюк тўпурар тўқнашади

 

Бугун Тошкент вақти билан соат 20:15 да Испания чемпионатининг марказий учрашувида "Барселона" ашаддий рақиби "Реал"ни қабул қилади.

 

Аслида "Эл Класико"ни ҳақида жуда кўп жиҳатдан таҳлил қилиш мумкин. Биз эса бугунги учрашувда икки буюк тўпурарнинг ўзаро рақобатига назар ташлаймиз. Аргентиналик ҳужумчи Лионель Месси бугунги кунда "Барселона"нинг, португалиялик суперфутболчи Криштиану Роналду эса "Реал"нинг кўпйиллик тарихидаги энг кўп гол урган футболчилардир.

 

Маълумотларга қараганда, Лионель Месси "Барселона" учун 472 та гол урган. Криштиану Роналду эса "Реал" рақиблар дарвозасига 376 та тўп киритган. Ҳар икки футболчи "Эл Класико" тўпурарлари рўйхатида ҳам юқори ўринларда қайд этилган. Жумладан, 2009 йилдан буён Испания чемпионатида тўп сураётган Криштиану "Барселона" дарвозасини 16 маротаба ишғол қилган ва "Эл Класико" тўпурарлари орасида учинчи ўринда қайд этилган.

 

2003 йилдан буён "Барселона" таркибида порлаётган Лионель "Реал"га гол уриш бўйича бош мутахассис ҳисобланади. Аргентиналик ҳужумчи "Эл Класико"да 21 марта зафар қучган ва бу борада якка пешқадам бўлиб турибди.

 

Криштиану Роналду ва Лионель Месси Испания чемпионати тўпурарлигида ҳам бир-биридан қолишмайди. Фаолияти давомида уч маротаба "Олтин тўп"ни қўлга киритган Роналду 2011, 2014 ва 2015 йиллари Испания чемпионати тўпурари сифатида Пичичи соврини билан тақдирланди. Беш карра "Олтин тўп" соҳиби Месси ҳам уч марта - 2010, 2012 ва 2013 йилларда тўпурарларнинг Пичичи совринига эга чиққан.

 

Испания чемпионатининг бу йилги мавсумида ҳам ҳар икки футболчи чемпионликдан ташқари тўпурарлар баҳсида ҳам рақобатлашмоқда. Криштиану Роналду ўнта учрашувда киритган ўнта голи билан биринчи ўринда бораётган бўлса, Месси ўнта ўйиндаги тўққизта голи билан уни таъқиб қилмоқда.

 

Бугун "Барселона" ва "Реал" учрашуви доирасида яна Месси ва Роналду рақобатининг янги қирраларини кўрамиз. Ҳар икки жамоанинг муваффақияти кўп жиҳатдан мана шу икки буюк тўпурар ўйинига боғлиқ бўлади.