"Аёллар футболи доим оғир аҳволда бўлиб келган" - "Навбаҳор - W" сардори Муқаддам Абдуллаева кўп ҳақиқатларни очиқ айтди! (интервью)

SPORTS.uz интервью рукнидан ўрин олган суҳбатларни давом эттиради. Бизнинг навбатдаги суҳбатдошимиз бугунги кунда ўзбек футболида ўз ўрнига эга Наманган вилоятининг аёллар футбол клуби "Навбаҳор - W" сардори Муқаддам Абдуллаева.

Ассалому алайкум, Муқаддам! Ижозатингиз билан илк саволни клуб ҳақида бермоқчиман. Айни пайтда"Навбаҳор - W"да кайфият қандай?

- Ассалому алайкум. Наманганликлар сафида 3 йилдан буён тўп тепмоқдаман. Жамоамиз йилдан йилга янгиланиб, кучайиб бормоқда ва яхши даражага етдик, деб ўйлайман. Жамоадаги қизларга келсак, барчаси тажрибали футболчилар. Турнир жадвалида эса, бироз омад етишмаяпти.

Аёллар футболи узоқ вақт давомида қаровсиз қолди, ҳеч ким эътибор қаратмади. Лекин ҳозир жамоалар учрашуви кузатув остига олинган. Бу "Навбаҳор - W" клубида қандай кўринишда?

- Аёллар футболи бироз вақт қийин аҳволда бўлмаган, ҳозир ҳам шундай! Суперлигада эркаклар клуби бўлиши учун мажбурликдан аёллар жамоасини очиб қўйишган ва айтганингиздек, у қаровсиз ҳолда. Кези келса, ҳурмат ҳам қилишмайди. Маошлар ҳам жуда кам ва ўз вақтида берилмайди (мукофот пулларини-ку, гапирмаса ҳам бўлади). Эътибор қаратиладиган клублар ҳам саноқли, бизнинг жамоада ҳам шароитлар ҳавас қиладиган даражада эмас. Афсус... Аёллар футболи ачинарли аҳволда.

Унда бугун сизни футболда ушлаб турган сабаб нима? Қай мақсадда футбол ўйнаяпсиз?

- Ягона сабаб - футболга муҳаббат. Аёллар футболини севгига ўхшатаман (кулиб), қийинчиликлари бор, азоблари бор, лекин фойдаси йўқлигини билган ошиқнинг севгисига ўхшайди. Шуни билган ҳолда футбол ўйнамоқдамиз.

Қачондир ўша муҳаббатингиздан воз кечишга тўғри келса нима қиласиз? Масалан, турмушга чиқсангиз?

- Албатта, бу дунёда ҳеч нарса абадий эмас! Ҳар бир инсон нимагадир эришиш учун нимадандир воз кечади. Менинг ҳам бошқа иложим йўқ.

Яқин орада бу воқеага гувоҳ бўлишимиз мумкинми?

- ИншаАллоҳ, лекин олдиндан бирор нарса айтолмайман. Аллоҳ насиб қилса, албатта, яқин кунларда шу лаҳзалар келади.

Ўзи яхши кўрганингиз борми?!

-Яхши кўриш фақат Аллоҳга нисбатан бўлади, инсонларга муҳаббат эса, фақат ота-онага.

Наманган футболи мухлислари билан бутун Ўзбекистонда шуҳрат қозонган. "Навбаҳор"нинг ҳар бир баҳси катта қизиқиш билан кутилиши сизларга ҳам бироз ёрдам берса керак?

- Аёллар футболига мухлислар жуда кам киришади. Чунки аёллар клуби борлигини ҳам билишмайди. Қизиқиш бўлиши учун аёллар футболи рекламага мухтож! Яқинда бир токшоуда ўтказилган махсус сўровномадан билдик-ки, Ўзбекистонда аёллар футболи борлигини деярли ҳеч ким билмайди.

Фақат реклама билан ҳал бўлади, деб ўйлайсизми? Негаки, Суперлиганинг ҳам баъзи жамоаларида бу муаммо ечим топмаган, гарчи ўйинлар жонли эфирда трансляция қилинса ҳам.

- Муҳими жамоа борлигини билишади-ку. Биз эса...

Тасаввур қилинг, бугун сизда шундай имконият бор, жамоани ўзгартириш учун нима қилган бўлар эдингиз?

-Аёллар жамоаларига шунчаки қарамаслик, балки эркаклардан кам бўлмаган ҳолда шароит яратишни истар эдим. Шу билан бирга, аёллар қийин ва машаққатли йўлни танлаганлиги учун маошларини оширилишини таъминлаган бўлардим.

Сир бўлмаса қанча маош оласиз?

-Бу сир бўлиб қолсин! Аёллар клубларида айтишга арзигулик маош берилмайди.

Сизга бошқа жамоалардан ҳам таклифлар бўлдими?

- Олдин "Бунёдкор", "Металлург" аёллар клубида ўйнаганман. Айрим сабабларга кўра, "Навбаҳор"га қайтишга мажбур бўлдим. Ҳозир ҳам таклифлар бўляпти, лекин насиб қилгани бўлади.

Оилангизда сизни касбингизни қандай қабул қилишган?

- Ҳеч қачон қаршилик қилишмаган. Ҳар доим мени танловимни маъқуллашган.

Футболчи, умуман олганда, спортчи қизлар орасида йигитларга ўхшаб кийинадиган, сочини турмак қиладиган қизлар ҳам бор. Бу қанчалик тўғри, деб ўйлайсиз?

- Тўғри, йигитларга ўхшаб кийинадиган, сочини турмаклайдиган қизлар нафақат футболда, балки бошқа спорт турларида ҳам жуда кўп учрайди. Лекин мен бунга қаршиман! Бу Аллоҳга ношукурлик, деб ўйлайман. Минг эркакча кийинган билан эркак бўлиб қолмайди. Ундан кўра, гўзал бўлиб, йигитларни куйдириб юрганга нима етсин(кулади).

Расмларингизни қизиқиб кўрганимда, рўмол ўраб тушган расмларингиз бор экан. Ростан ҳам ўраганмисиз?

-Ўтган йили оиламизда оғир жудолик бўлди, опам вафот этдилар. Шу сабабли, ўраниб юрдим. Футбол туфайли яна ечишга мажбур бўлдим, афсуски.

Охиратлари обод бўлсин. Бўш вақтларингизда қандай машғулотлар билан шуғулланасиз?

- Омин! Жуда ҳам уйқучиман(кулиб), ухлаш билан шуғулланаман. Уйқудан ортсам, овқат пишириш ва тикишга вақт ажратаман.

Ўйиндан олдинги машғулотлар ҳақида гапирсангиз. Неча маҳалдан шуғулланасизлар?

- Ҳозир машғулотсиз майдонга тушамиз. Кўриб турганингиздек, барчаси эътиборсизлик туфайли!

Ҳақиқатлар ва самимий суҳбатингиз учун раҳмат. Аёллар футболига эътибор кучайиши ва фаолиятингизда омад тилайман.

- Сизга ҳам раҳмат. ИншаАллоҳ, шу кунларни интизорлик билан кутамиз.