Ҳасанбой Дўсматов ким билан жанг қилиш истагида эканлигини маълум қилди

Рио Олимпиадаси чемпиони ҳамда "Вэл Баркер" кубоги соҳиби ҳамюртимиз Ҳасанбой Дўсматов ҳозирда профессионал боксда фаолият юритмоқда. 

Бугунга қадар у профессионал рингда 4 та жанг ўтказди ва барчасида муддатидан аввал ғалаба қозонди. Шунингдек, у Россиянинг "Мир бокса" промоутерлик компаниясининг мижози ҳисобланади. Яқиндагина янгиланган WBA рейтингининг биринчи ўта енгил вазн (48,9 кг) тоифасида Дўсматов 5-ўринда қайд этилди. Умумий олиб қараганда, ҳамюртимиз тез орада чемпионлик жангида рингга кўтарилиш имкониятига эга. 

Шу нуқтаи назардан, биз Ҳасанбой Дўсматовнинг режалари билан қизиқдик. 

- Ҳасанбой Тошкентдаги муваффақиятли жангингиздан сўнг, қайсидир маънода чемпионлик жангига яқинлашдим, деган фикрдамисиз?

- Албатта, ҳаракат қиляпмиз. Энди, барчаси промоутерларимизга боғлиқ. Қандай рақибни беришса, жанг қилаверамиз. 

- Демак, чемпионлик жангига тайёрсиз?

- Албатта. 

- Навбатдаги жанг борасида ўзи бирор янгилик борми?

- Ҳозирча йўқ. 

- Ҳаваскор боксда дуч келган қайси рақибингиз билан профида дуч келишни жуда-жуда хоҳлардингиз?

- Сакен Бибосинов билан жанг қилишни истардим. 

- Бу аввалги саволимизнинг давоми десак ҳам бўлади. Яъни, сиз 47.6 ҳамда 48.9 кгда ҳам жанг ўтказасиз. Айтингчи, ушбу вазн тоифаларидаги қайси чемпион билан тезроқ рингга кўтарилиш истагидасиз?

- Биринчи ўта енгил вазн (48,9 кг) тоифасида WBA чемпиони Хирото Кёгучи (15-0-10 КО) билан тезроқ жанг қилишни хоҳлардим. У билан жанг қилишга ўзимни тайёр, деб биламан.