Питер Хюистра "Пахтакор"нинг мавсумдаги илк мағлубиятига нима сабаб бўлганини айтди

“Пахтакор” клуби жорий мавсумдаги илк мағлубиятини Андижонда қабул қилиб олди. Ўйин якунига етганидан кейин “Пахтакор” устози Питер Хюистра мағлубиятнинг сабаблари ҳақида фикр билдирди.

- Бугун бизга қийин бўлди. “Андижон” ҳисобда олдинга чиқиб олгач, жуда зич ҳимояланди. Шу сабабли ҳимояни ёриб ўтишимиз анча қийин кечди. Бунинг учун “Андижон” жамоасини табриклаган бўлардим. Бизда эса биринчи мағлубият бўлди. Бугун қанақадир футбол ўйнашимиз қийинроқ бўлди. Лекин олдинга қараб давом этамиз.

- “Андижон”нинг охирги ўриндалиги ўйиндан аввал “Пахтакор”ни бўшаштирдими?

- Олдин ҳам айтгандим, ҳозир ҳам айтаман: Суперлигада осон ўйинлар йўқ. Айниқса, охирги ўриндаги клублар жуда зич ҳимояланиб, уюшқоқ ўйнашади. Бу билан турнир жадвалидаги юқори ўринларда бораётган клубларни бемалол қийнаб қўйиши мумкин. Бугун шу нарсага гувоҳ бўлдик.

- “Пахтакор”нинг ўйинида нима учун пасайиш кузатиляпти?

- Масалан, “Металлург”га учта гол урдик.”Навбаҳор” билан ҳам яхши ўйнагандик. Лекин бугун ўйинимиз ўхшамади. Боя айтдим, пастки ўринлардаги жамоалар гол урса, кейин улар жуда зич ҳимояланишади. Қолаверса, бундай майдонда футбол ўйнашнинг имкони йўқ. Биз ҳар доим футбол ўйнашни хоҳлаймиз. Афсуски, бундай майдонда буни уддалашнинг имкони йўқ эди. Тўпни олдинга тепиб ўйнаш – бу бизнинг футбол эмас. Шунинг учун ўйинимиз ўхшамади.

- Ҳакамлар бригадасига кўплаб эътирозлар билдирдингиз. Бунга асосий сабаб?

- Ўйин пайтида ҳакамларга ҳеч нима деганим йўқ. Фақат иккинчи бўлимга тўрт дақиқа қўшилганида эътирозларимни билдирдим. Чунки кўплаб ўйинчи алмаштиришлар бўлди. Бундан ташқари, “Андижон” футболчилари майдонга кўп ётиб олишди. Шу сабабдан қўшилган тўрт дақиқани жуда кам деб тортишдим. Шуни муҳокама қилдим, бошқа пайтларда эътирозим бўлмади.

- “Андижон”га шунча жамоалар келди, аммо биринчи марта майдон борасида эътироз бўляпти. Балки бу “Пахтакор”нинг ютқазгани билан боғлиқдир?

- Биринчи навбатда сизга майдонга чиқиб яхшилаб назар ташлашни маслаҳат берардим. Кейин фикр билдиришингиз мумкин.

- Андижон ва “Бобур арена” ёқдими?

- Албатта, Ўзбекистон шаҳарлари ёқади. Мен тўрт ярим йилдан бери шу ерда яшайман. Жуда чиройли ва ёқимли. Бундай шаҳарларни кўришдан ҳар доим завқланаман.