"Навбаҳор"нинг Ўзбекистон Кубогида "Динамо"га қарши статистикаси қандай?

Ўзбекистон Кубоги гуруҳ босқичи, 3-туридан ўрин олган баҳсда “Навбаҳор” сафарда “Динамо” (Самарқанд) жамоаси меҳмони бўлади.

Хабарингиз бор, мамлакатимизнинг энг совриндор клублари қаторидан жой олган ва Суперлига (олий лига)мизнинг мунтазам иштирокчиси бўлган “Навбаҳор” биллур совринни 3 марта – 1992, 1995 ҳамда 1998 йилларда қўлга киритган ва 1993 ҳамда 2022 йилларда финал иштирокчисига айланиб, ҳал қилувчи баҳсларда “Пахтакор” (0:3, 1993 йили) ва “Насаф” (1:2, 2022 йил) жамоаларига имкониятни бой берган.

“Динамо” эса бир марта, 1999/2000 йиллар мавсуми Ўзбекистон Кубоги ўйинларида финалга чиқиб, ҳал қилувчи баҳсда “Дўстлик”ка (1:4) имкониятни бой берган. 

Мазкур жамоалар  Ўзбекистон Кубоги доирасидаги беллашувларда ўзаро 5 марта рўбарў келишган.

Ушбу ўйинларнинг 3 тасида “Навбаҳор” ғалаба қозонган бўлса,  1 та баҳсда самарқандликлар зафар қучишган, яна битта учрашувда эса дуранг қайд этилган. Тўплар нисбатидаги устунлик ҳам “Навбаҳор” тарафида – 12 - 6. 

Мазкур жамоаларнинг Ўзбекистон Кубоги доирасидаги барча учрашувлари натижалари:

1994 йил. 1/4 финал

“Динамо” – “Навбаҳор” – 0:3

“Навбаҳор” – “Динамо” – 4:1

2010 йил. 1/8 финал

“Динамо” – “Навбаҳор” – 2:1

“Навбаҳор” – “Динамо” – 3:3

2022 йил. Гуруҳ босқичи

“Навбаҳор” – “Динамо” – 1:0

Эслатиб ўтамиз, “Динамо” – “Навбаҳор” учрашуви 28 апрель куни Жиззахдаги “Сўғдиёна” марказий стадионида соат 18:00 да старт олади.

“Навбаҳор” ПФК матбуот хизмати.