"Ливерпуль" "Реал"га ўтмоқчи бўлган юлдузига шартнома таклиф қилди

"Ливерпуль" жамоа марказий ҳимоячиси Иброҳим Конатенинг янги шартномасини тақдим этди. Мерсисайдликлар франциялик футболчи шартнома бўйича жорий трансфер ойнаси ёпилгунга қадар (1 сентябрь) бир қарорга келишини истамоқда. Футболчининг клуб билан амалдаги келишуви 2026 йилнинг ёзига қадар мўлжалланган. Бу ҳақда DaveOCKOP ижтимоий тармоғидаги Х саҳифасида маълум қилди.

Манбага кўра, "қизиллар" ўтган мавсумнинг катта қисмида узайтирилиши муҳокама қилинган ҳужумчи Муҳаммад Салоҳ шартномаси билан боғлиқ вазият такрорланишига йўл қўймоқчи эмас.

Агар Конате трансфер ойнаси тугашидан олдин янги меҳнат шартномасини имзолашга рози бўлмаса, "Ливерпуль" келаси йили футболчисини текинга йўқотмаслик учун уни 35 миллион фунт стерлингдан (40,6 миллион евро) кўпроққа сотиши мумкин.

Конате "қизиллар" сафида 2021 йилнинг ёзидан буён тўп суриб келмоқда. Бу вақт ичида ҳимоячи барча турнирларда 134 та ўйинда майдонга тушиб, бешта гол ва тўртта голли узатмани амалга оширди. Трансфермаркт порталида келтирилган маълумотларга кўра, футболчининг бозор нархи 60 млн еврони ташкил этади.