"Мақсадим аниқ" ёхуд совриндор легионеримиз яна чемпионатимизга қайтди

Навоийнинг “Қизилқум” клуби ёзги трансфер чоғида таркибига таянч ярим ҳимоячиси Асрор Ғофуровни қўшиб олди. Мухлислар уни яхши эслашади. Илгари ҳам чемпионатимизда “Андижон” ва “Сурхон” сингари клубларда тўп сурган. Ундан аввал эса Туркия чемпионатида фаолият олиб борган. Охирги уч йилни Бангладеш чемпионатида ўтказиб, қатор совринларни ютиб қайтди.

- Асрор, "Қизилқум" билан шартнома имзоладингиз. Бундай қарорни қабул қилишингизнинг асосий сабаби нимада?

- 3 йил давомида легионер сифатида бошқа мамлакат чемпионатида тўп сурдим. Албатта, 3 йил узоқ муддат. Тўғриси, Ўзбекистонни соғиндим. Она ватан барибир она ватан.

- Маълумки, сиз бир неча мавсум Бангладеш чемпионатида тўп сурдингиз. Совринларни ҳам қўлга киритдингиз. Барчаси сиз учун қониқарли кечдими ёки нимадандир қониқмаган жиҳати ҳам бўлдими?

- Бангладешдаги 3 йилилк фаолиятимдан кўнглим тўлди. Бангладешдаги барча совринларга эга чиқдим, Худога шукр. Барчаси кўнгилдагидек бўлди.

- Олдингизда сир бўлмаса яна қандай вариантлар бор эди?

- Олдимда Бангладеш, Индонезия ва Таиланд Суперлигаларидан вариантлар турганди.

- "Қизилқум" таркибида сиз яхши билган футболчилардан кимларни учратдингиз?

- “Қизилқум”да Файзулло Қамбаров, Самандар Шукуруллаев, Бахтиёр Қосимов, Азизбек Усмонов кабиларни яхши билардим.

- Легионер сифатида тўп сурдингиз ва ортга қайтдингиз. Ўтган вақт мобайнида қанчалик ўзгардим, деб айта оласиз?

- Яхши ёки ёмон тарафга ўзгариш футболчини ўз қўлида. Яхши томонга ўзгардим, деб ўйлайман.

- Бангладеш футболида ўзингиз учун нимадир олдингизми?

- Қандайдир тажриба бўлди, деб ўйлайман. Олдин ҳам айтгандим, ҳамма жойда футбол ривожланяпти. Бангладеш футболида ҳам ўсиш бор.

-  "Қизилқум" билан қандай мақсадни кўзлаяпсиз?

- Мақсадим аниқ. Тезроқ ўйинлар бошланиб, максимал очколарни йиғиш ва иложи борича жамоани юқорироқ ўринларга олиб чиқишда ўз ҳиссамни қўшмоқчиман.

Шуҳратбек Жўраев.