118:9: “Barselona” futbol o‘ynashni qizlardan o‘rgansin!

“Barselona” xotin-qizlar jamoasi milliy chempionatning navbatdagi turida “Granada” maydonidan 4:1 hisobidagi g‘alaba bilan qaytdi va muddatidan oldin chempionlikni qo‘lga kiritdi.

Kataloniyalik qizlar 26 ta uchrashuvdan 25 tasida zafar quchgan, bir marotaba durang o‘ynagan va hali mag‘lubiyatga uchragani yo‘q. To‘plar nisbati ham 118:9.

“Barselona” qizlari ketma-ket beshinchi, umumiy hisobda esa to‘qqizinchi chempionligiga sazovor bo‘lib, bu borada rekord o‘rnatdi.

“Barselona” erkaklar jamoasi uzoq yillik faoliyati davomida hech qachon ketma-ket besh bor chempionlikka erisha olmagan. Eng yaxshi ko‘rsatkich 1991-1994 yillarda qayd etilgan bo‘lib, o‘shanda jamoa qatorasiga to‘rt bor La Liga g‘olibi bo‘lgandi.

“Barselona” qizlar jamoasi 25 may kuni Evropa Chempionlar ligasi finalida “Lion” bilan kuch sinashadi.