18-"Улкан тож"ини қўлга киритган Жокович, даҳшатли камбэк қурбонига айланган Надаль, тўхтатиб бўлмас Осака - "Australian Open-2021" якунлари

Теннис ихлосмандлари катта қизиқиш билан кузатиб борган "Australian Open-2021" кўп жиҳатлари билан мухлислар ёдида қолди. Ушбу мусобақа орқали ёш авлод вакиллари ўйинларини кузатиб теннисга қизиққан баъзи дарғаларнинг даври ўтиб бораётгани янада яхшироқ ҳис қилди. Аввало, йилнинг илк "Катта дубулға"сини ўтказиб юборишга мажбур бўлган Рожер Федерернинг ўзи ҳам гапимизга исбот бўла олади. Яъни, маэстро жароҳатидан тўлиқ тикланишга улгурмади ва ўз юришини март ойида бўлиб ўтадиган турнирлар билан бошламоқчи. Тўғри, швейцариялик ракетка устаси оёғини шикастлаб олгани учун даволанмоқда, аммо тикланиш жараёнида ёш факторининг ҳам роли анча катталигини ҳеч ким рад эта олмайди.

Бундан ташқари, аёллар ўртасидаги баҳсларда Серена Уильямс гегемониясига барҳам берилаётгани ҳам яққол кўзга ташланмоқда. Айнан "Australian Open-2021"га катта умидлар билан келган океанорти вакиласи ярим финалда ўз юришини тўхтатишига тўғри келди. Жисмонан бақувват Уильямсга ўзига ўхшаган теннисчидан бошқа ким ҳам бас кела оларди, дейсиз! Маълумот ўрнида, Денис Истомин ҳам "Улкан тож"да иштирок этиш учун ариза топширган ва ўз омадини саралаш босқичида синаб кўрганди. Аммо яна ўша гап - аввалги тезкор, кучли ва аниқ зарбалари билан ҳатто Жоковичдан устун кела оладиган Истомин тарихда қолди, назаримизда. Бу билан Дениснинг вақти ўтди деган фикрдан йироқмиз. Аммо ёш фактори ўз сўзини тобора баландроқ айтиб бораётганини ҳам ҳеч ким инкор эта олмайди. Теннис оламида ўз ўрнига эга катта номларни ўз совринлар музейида ёлғиз қолдирган ҳолда, "Australian Open-2021"нинг яккаликдаги чемпионлари ҳақида суҳбатлашамиз!

Новак Жокович

Ўз юришини 8 февраль куни Жереми Шардига қарши ўйин билан бошлаган Новак осонликча зафар қучди ва турнирни ишончли ғалаба билан бошлади. Бу спортда анча муҳим ҳолат саналади. Бироқ кейинги баҳсларда унга жиддий рақобат таклиф этилди: қаҳрамонимиз 3-босқичда катта қийинчилик эвазига рақибини мағлубиятга учратди. Аутсайдер Тейлор Фритц айни пайтдаги жаҳон теннис қиролидан 2 та сет тортиб олишга муваффақ бўлди. Аммо якунда даража ўз сўзини айтди ва Жокович кейинги босқичга йўл олди. Шундан кейин ҳар қандай эҳтимолий сенсациялардан эҳтиёткорликни сақлаган сербиялик қолган беллашувларда ортиқча тер тўкмади. Милош Раонич, Александр Зверев, Аслан Карацев ҳамда Даниил Медведев каби истеъдодли ракетка соҳиблари "иштаҳаси очилган" Новакни тўхтата олмади. Бунга бир томондан асосий рақобатчи Рафаэль Надалнинг чорак финалда ўз юришини тўхтатгани ҳам сабаб бўлди. Акс ҳолда, биз одатдагидек супер финал гувоҳига айланишимиз мумкин эди. Ўзи Надалга нима бўлди? Испаниялик даҳшатли камбэк қурбонига айланди. Циципасга қарши кортга чиққан Рафа дастлабки сетни ўз ҳисобига ёздириб, бироз хотиржамликка берилди. Вазиятдан унумли фойдаланган юнон спортчиси якунда 6:3, 6:2, 6:7, 4:6, 5:7 ҳисобида мағлубиятга учради. Бу Жоковичга янада мотивация берган бўлса ажаб эмас.

Жаҳоннинг энг совуққон теннисчиларидан бири ҳисобланадиган Жокович ушбу ғалабаси орқали асосий рақобатчиларига янада яқинлашиб олди. Гап шундаки, энди сербиялик спортчи ҳисобида 18 та "Улкан тож" туркумига кирувчи титул мавжуд. Бу борада у 20 тадан шундай совринга эга Рожер Федерер ҳамда Рафаэль Надалга яна бир қадам яқинлашиб олди. Бундан ташқари, айни дамдаги жаҳон тасниф жадвалида Рафани 2180 очкога ортда қолдирмоқда. Бу яхшигина фарқ ва руҳий устунлик бериши табиий.

Наоми Осака

Япониялик ушбу спортчи аёллар теннисининг янги юлдузига айланиб улгурди. Ундаги техника, аниқлик ва энг муҳими, ғалаба учун ташналик жуда юқори даражада. "Australian Open-2021"да ҳам унинг юқоридаги ҳислатлари унга қўл келди. Қаҳрамонимиз бутун турнир мобайнида атиги 1 та гэймда имкониятни бой берди, холос. Эътибор беринг, мусобақа давомида қитъадошимиз умумий ҳисобда 13 та гэйм ўтказди. Шулардан 12 тасида ғалаба қозонган теннисчи ғалаба учун мутлақо ҳақли. Ўша биргина тортиб олинган очко ҳам анча кучли Гарбинье Мугуруса билан ўйинга тўғри келади. Умуман олганда, Наоми "Катта дубулға" турнирида 2 та жиддий учрашув ўтказди дейиш мумкин. Бири юқорида айтилган Мугурусага қарши 4:6, 6:4, 7:5 ҳисобидаги ғалаба бўлса, иккинчиси сўнгги йиллардаги теннис гегемони Серена Уильямс билан ўтказилган беллашув. 23 ёшли япон қизи финал остонасида тажрибали Уильямсни ҳам турнир билан хайрлашишга мажбур этди.

Тан олиш лозим, Осаканинг бу қадар осон зафар қучишига турнир олдидан фаворитлар қаторида эътироф этилган Эшли Барти, София Кенин, Виктория Азаренко каби теннисчиларнинг сенсацион тарзда ўз юришини тўхтатиши ҳам сабаб бўлди. Тасниф жадвали етакчиси Барти чорак финалда ракеткаларини ғилофига жойлашга мажбур бўлди. Каролина Муховадан илк сетда устун келган мезбонлар вакиласи кейингиларини ютқазиб қўйди. Шунингдек, амалдаги чемпион София Кенин ҳам 2-босқичда Кайя Канели қаршилигини енга олмади. Юқоридаги натижалардан ҳам кўриниб турибдики, пандемия биздан кўп  нарсани олиб қўйди. Шунга қарамай, ўз кучини тўғри тақсимлай олган ракетка усталари зўрлигини исботлаб бормоқда. Бу ҳақиқатан ёқимли ҳолат, назаримизда.

Қизиқарли фактлар

Федерердан ўзиб кетган Жокович Надалга  яқинлашди!

"Australian Open-2021"да тенгсиз бўлган Жокович 1 турдаги "Катта дубулға" турнирларидаги ғалабалари сонини 9 тага етказиб олди. Яъни, энди Новак ҳисобида Авсралия очиқ чемпионатининг 9 та бош соврини мавжуд. Бу борада у "Wimbledon"нинг 8 карра ғолиби Рожер Федерерни ортда қолдирди. "Roland Garros"да буткул гегемония ўрнатган Рафаэль Надаль 13 та титул билан карвонбошилик қилмоқда.

Рус теннисчиларидан рекорд натижа

Россиялик 3 нафар теннисчи тарихда илк бор "Катта дубулға" туркумига кирувчи мусобақа чорак финалига йўл олди. Яъни, 20 тартиб рақам остида сараланган Феликс Оже-Альяссимни мағлуб этган Аслан Карацев рус спортчиларидан биринчи бўлиб кейинги босқичга чиқди. Иккинчи йўлланма Андрей Рублёвга насиб этди. Норвегиялик Рууд Касперга қарши кортга чиққан Рублёв техник ғалаба туфайли чорак финалга йўқ олди. Унинг рақиби 2 сетни бой берганидан кейин, ўйинни давом эттира олмади. Шунингдек, АҚШ шарафини ҳимоя қилган МакКензи МакДональддан 3 сетда, 6:4, 6:2, 6:3 ҳисобида устун келган Даниил Медведев Россияга "Australian Open" чорак финалининг 3-чиптасини тақдим этди.

Даниил Медведев ўз фаолиятидаги энг баланд парвозни амалга оширмоқда

Австралия очиқ чемпионатида иккинчи ўринни банд этган Медведев янгиланган ATP рейтингида кучли учликка кириб олди. Мусобақа олдидан 8715 очко билан тўртинчи поғонани банд этган рус спортчиси 1200 очкони ўз ҳисобига қўшиб олган ҳолда, 9125 очкога эга Доминик Тимни ортда қолдирди.

Юқорида йилнинг энг нуфузли турнирлари дебочаси ҳақида фикр алмашишга ҳаракат қилдик. Эндиги навбат Буюк Британия кортларида ўтказиладиган "Wimbledon"га. Ушбу мусобақа 28 июнь-11июль оралиғида бўлиб ўтиши режалаштирилган. Биз эса энг сўнгги теннис янгиликларини сиз азиз мухлисларга етказиб туришга ҳаракат қиламиз. Биздан узоқлашманг!

Жавоҳир Азимов тайёрлади