Артуро Видалнинг “Барселонa”га ўтишидан кимга фойда, кимга зарар?

“Барселона” ушбу ёзда шундоғам муваффақиятли таркибни янада кучайтириш бўйича анча фаоллик кўрсатмоқда.

Аллақачон ўз сафига Клеман Лангле, Артур ва Малкомларни қўшиб олган Ла Лиганинг амалдаги чемпионлари энди Артуро Видални олиб келишди.

Чилилик футболчи Бундеслига чемпиони “Бавария”дан 26.7 миллион фунт эвазига каталонияликлар сафига ўтди ва уч йиллик шартномага имзо чекди.

Бошида Видалнинг “Интер”га ўтиши қизғин муҳокама қилинаётганди. Бироқ “кўк-анорранглилар” яна сўнгги дақиқаларда “орага суқилди” ва ярим ҳимоячини сотиб олди.

Хўш, чилилик футболчининг “Барселона”га ўтишидан кимга фойда-ю кимга зарар?

Фойда: Эрнесто Валверде

Ёз “Барселона” бош мураббийи Валверде учун анча оғир бошланди. Боиси майдоннинг ярим ҳимоя чизиғи катта йўқотишга учради. “Барса” клубдаги 22 йиллик фаолиятидан кейин Япониянинг “Виссель Кобе”га ўтган Андрес Иньеста билан хайрлашди. Бу ҳам камдек, бир йиллик мазмунли фаолиятидан кейин Паулиньо яна ортга “Гуанчжоу”га қайтди.

Бироқ Видал Валверде кутган трансфер бўлди. Ушбу трансфер амалга ошгани заҳотиёқ бош мураббий “Видал ярим ҳимояга энергия қўшадиган биз кутган футболчи” дея лўнда жавоб қайтарди.

“Унда катта тажриба борлигини биламиз. Олдинги жамоаларида кўплаб ўйинлари жуда яхши. У майдонда йўқолиб қолмайди.”

Иньестанинг ўрнини тўлдириш имконсиз бўлсада, Паулиньоникини тўлдирса бўлади. Валверде бундай таркиб билан нафақат Ла Лига, балки Европада яна тожни қайтариб олишга уриниб кўриши мумкин.

Зарар: “Интер”

Ушбу ёзда иккинчи марта “Барселона” А Серия вакилларини “чув туширмоқда”. Дастлаб, “Рома”га ўтиши ҳал бўлган Малком “илиб кетилганди”. Энди эса “Интер”га ўтиш имконияти юқори бўлган Артуро Видал каталонияликларнинг “ўлжаси”га айланди.

Bild нашрига кўра, “нерадзуррилар” Видални дастлаб ижарага олишни, мавсум якунида тўлиқ сотиб олишни мўлжаллашганди. Бироқ Видал ва унинг агентини доимий кўчиш варианти қониқтирарди. Ва шу лаҳзада “Барса” пайдо бўлди ва Видал сўраган шартларни бажарди.

Энди “Интер” “Реал” етакчиси Лука Модрич учун курашмоқчи. Бироқ Перес Жаҳон Чемпионати “Олтин тўп” соҳибини 750 миллион евродан камига рози бўлмаслигини айтганидан кейин “Интер” бирорта салоҳиятли ярим ҳимоячисиз қолиши ҳеч гап эмас.

Фойда: Артуро Видал

Видал ушбу ёзда ўзига янги клуб қидираётган эди. Бироқ “Бавария”дек номдор клуб топиш масаласи қийин эди. Аммо якунда у бунинг уддасидан чиқди.

Ёшига қарамай, Видал тезлиги эвазига асосий таркибда ярим ҳимоядан ўзига жой топа олиши мумкин. Боз устига Валверде уни Паулиньога тўғридан-тўғри ўринбосар сифатида кўрмоқда.

Агарда чилилик футболчи “Интер”га ўтганида борми, у Наингголан, Жоао Марио, Брозович ва Весино каби “наҳанглар” билан тинмай рақобат қилишига тўғри келарди. 31 ёшли ярим ҳимоячи ярим ҳимояси бироз кучсизланиб қолган “Барселона”да ўз ўрнини топиб кетиши мумкин.

Зарар: Денис Суарес

Ушбу ҳафта Денис Суарес учун хайрли бўлмади. 24 ёшли ярим ҳимоячи 2016-йилда клубга қайтганидан бери асосий таркибга кириш учун курашиб келади.

Аввал бу йўлда унга Иньеста, Ракитич ва Бускетс изн бермаган бўлса, кейин Паулиньо ва Филиппе Коутиньо унинг имкониятларини чеклаб қўйди.

Агарда Суарес Иньеста ва Паулиньонинг клубдан кетганини асосий таркибга кириш учун умид учқунларини очган бўлса, чилилик футболчининг келиши бунга яна раҳна солиши мумкин.

Фойда: Серхио Бускетс

Паулиньо кетгач Бускетснинг янги мавсумдаги иши бироз қийинлашиши кутилганди. Сабаби бразилиялик ярим ҳимоячи ўтган мавсумда Бускетсга ҳимоявий ишларда анча камарбаста бўлганди.

Испаниялик футболчи дунёнинг энг яхши ярим ҳимоячиларидан бири. Бироқ унга ҳам майдон ўртасида ёрдамчи шерик зарур. Бу вазифани Видал бажариши мумкин. Ўтган мавсумда Видал Бундеслигада ҳар 90 дақиқада 4.3 марта рақибни тўхтатиб қолган. 22 ўйинда эса 88.5 % билан аниқ узатмаларни амалга оширган.

Қиёслайдиган бўлсак, Паулионьо ҳар 90 дақиқада 1.8 марта рақибни тўхтатган бўлса, аниқ узатмалари кўрсаткичи – 87.8 % ни ташкил қилади.

Зарар: “Барселона”

Баъзи клуб мухлислари ва шахсан Эрнесто Валверде Видал трансферида ижобийликни кўраётган бўлсада, чилилик футболчи клубнинг трансфер стратегиясида оқсоқликлар борлигини кўрсатмоқда.

Видал айни вақтда 31 ёшда ва шартномаси муддати охирида 34 га киради ва футболчилик фаолиятини якунлаши ҳам мумкин.

Албатта у Криштиану Роналду эмас, Видал клубдаги фаолияти давомида пастга шўнғий бориши аниқ. У клубда нари борса бир йил юқори спорт формасида бўлиши мумкин. Бир йил футболда узоқ муддат бўлиши мумкин. Дунёнинг баъзи иқтидорли ёшлари мавсум ўртасидагидан кўра анча арзонроққа тушиши мумкин эди. Қисқаси Видалнинг трансферини яхши дейишимиз мумкин. Бу фақатгина қисқа муддатли келажакда.

Эркинжон Ғайбуллаев тайёрлади.