Факт! Ўзбекистон миллий терма жамоаси Жанубий Кореяни фақат бир марта мағлуб этган
Ўйин «Queensland Sport and Athletics Centre» стадионида бўлиб ўтади ва маҳаллий вақт билан соат 20:00да (Тошкент вақти билан 15:00) бошланади. Эслатиб ўтамиз, Эктор Купер шогирдлари Австралиядаги йиғин доирасида дастлабки ўйинни 15 ноябрь куни Ливан терма жамоасига қарши ўтказишган ва 0:0 ҳисобидаги дурангни қайд этгандилар.
Учрашувни Крис Бит бошчилигидаги австралиялик ҳакамлар гуруҳи бошқариб боришади. Рефери ассистентлари - Эшли Бичем ва Антон Шетинин. Тўртинчи ҳакам - Питер Грин.
Яна бир муҳим маълумот. Ўзбекистон - Жанубий Корея ўртоқлик учрашувида VAR тизими ишлайди. VAR бўйича ҳакам Жарред Гиллет, ассистент - Ричард Наумовски.
Шу кунгача Ўзбекистон Жанубий Корея терма жамоаси билан жами 15 та учрашув ўтказган. Шулардан 1 тасида Ўзбекистон ғалаба қозонган бўлса, 10 та учрашувда Жанубий Кореянинг қўли баланд келган. 4 та ўйин дуранг билан якунига етган. Ягона ғалабамиз 1994 йилги Осиё ўйинларига тўғри келади. Ўшанда Азамат Абдураимовнинг ягона голи терма жамоамизга ғалаба тақдим этганди.
Умид қилиб қоламизки, бугун вакилларимиз чиройли ўйин намойиш қилиб, юртимиздаги миллионлаб футбол мухлисларини хурсанд қилишади.
Ўртоқлик учрашуви
Соат 15:00. "QSAC" стадиони, Брисбен.
Ўзбекистон - Жанубий Корея
Фикрлар